Qazaqstanda ata-analar balasyn birinshi synypqa oqý jylynyń basynda áli alty jasqa tolmasa da bere alady. Bas shart — alty jas aǵymdaǵy kúntizbelik jyldyń sońyna deıin tolýy kerek. Bul týraly infohub.kz saıty Oqý-aǵartý mınıstrliginiń «Kýrsıv» basylymynyń resmı saýalyna bergen jaýabyna silteme jasap habarlaıdy.
Vedomstvo mundaı múmkindiktiń «Bilim týraly» zańda qarastyrylǵanyn túsindirdi. Qujatqa sáıkes, birinshi synypqa alty jasqa tolǵan balalar, sondaı-aq aǵymdaǵy kúntizbelik jyly alty jasqa tolatyn balalar ata-anasynyń nemese ózge de zańdy ókilderiniń ótinishi boıynsha qabyldanady. Osylaısha, eger bala alty jasqa, mysaly, 2026 jyldyń qazan nemese jeltoqsan aıynda tolsa, ata-ana ony osy oqý jylynda mektepke bere alady.
Sondaı-aq mınıstrlik bolashaq birinshi synyp oqýshysynyń daıyndyq deńgeıi onyń mektepke túsý quqyǵyna áser etpeıtinin atap ótti. Mektepter qyzmet kórsetý aýmaǵynda turatyn barlyq balalardy, olardyń oqı, jaza nemese sanaı bilýine qaramastan, qabyldaýdy qamtamasyz etýge mindetti. Jaýapta: «Bilim berý uıymynyń qyzmet kórsetý aýmaǵynda turatyn barlyq balalardyń daıyndyq deńgeıine qaramastan qoljetimdiligi qamtamasyz etiledi», — delingen.
Oqý bastalǵannan keıin balanyń oqý baǵdarlamasyn meńgerýde qıyndyqtar týyndasa, muǵalim oǵan jeke qoldaý kórsetýi tıis. Mınıstrlikte: aqaýlar anyqtalǵan jaǵdaıda pedagog oqý baǵdarlamasyn sátti meńgerýge baǵyttalǵan túzetý jáne qosymsha jumystar uıymdastyrady, — dep túsindirdi. Erekshe bilim berý qajettilikteri bar balalar úshin oqý jaǵdaılary erekshe bilim berý qajettilikterin eskere otyryp anyqtalady, olardy anyqtaý úshin psıhologıalyq-medısınalyq-pedagogıkalyq konsýltasıada tekserýden ótý qajet.
Jańa oqý jylynda Qazaqstanda 380 myńnan astam birinshi synyp oqýshysy kútilýde. Oqý-aǵartý mınıstrliginiń sońǵy derekteri boıynsha, mektepterge shamamen 320 myń bala qabyldanǵan — bul boljamdy sanyń shamamen 84 paıyzy. Onyń ishinde erekshe bilim berý qajettilikteri bar balalar — tórt myńǵa jýyq. Shamamen 296 myń bolashaq birinshi synyp oqýshysy memlekettik mektepterge, taǵy 23 myńǵa jýyǵy jeke mektepterge qabyldanǵan. Qalalarda birinshi synypqa shamamen 191 myń bala, aýyldyq jerlerde — shamamen 128 myń bala qabyldanǵan.
Ótinishterdi qabyldaý 31 tamyzǵa deıin jalǵasady. Mınıstrliktiń dereginshe, ata-analardyń shamamen 84 paıyzy qujattardy elektrondy túrde tapsyrǵan. Buǵan deıin «Kýrsıv» birinshi synyp oqýshysyn mektepke daıyndaý shamamen 150 myń teńgege túsýi múmkin dep eseptegen.