19 shildede Qazaqstanda bankaralyq tólemderdiń biryńǵaı QR júıesi iske qosylady, alaıda onyń tolyqqandy jumysy birden bastalmaýy múmkin — qyzmettiń qoljetimdiligi naqty bankterge baılanysty bolady, dep habarlaıdy infohub.kz saıty.
Qazaq Expert Club-tyń qarjy sarapshysy Aıgerim İlıasovanyń aıtýynsha, bankterdi júıege qosý kezeń-kezeńimen júrip jatyr jáne 19 shildege deıin bul proses aıaqtalýy tıis. Degenmen, iske qosylǵannan keıingi alǵashqy aptalarda qyzmettiń jumys isteýi satyp alýshy men saýda núktesi qaı banktiń qyzmetin paıdalanatynyna baılanysty ártúrli bolýy múmkin.
Biryńǵaı QR-dyń tolyqqandy jumys isteýi úshin birneshe negizgi mindetti sheshý qajet: tólemderdi júrgizý sharttaryn, sonyń ishinde ekvaırıń komısıasynyń mólsherin kelisý, alaıaqtyqtan qorǵaýdyń senimdi tetikterin qurý jáne derekterdi qaýipsiz almasýdy qamtamasyz etý. Biryńǵaı QR-dyń bolmaýy, eń aldymen, bızneske keri áser etedi — kásipkerler birneshe bankpen jumys isteýge májbúr, ártúrli termınaldar nemese QR-kodtardy qoldanady. Sonymen qatar, saýda núkteleri tólem somasynyń shamamen 1% mólsherinde ekvaırıń tóleıdi, bul shaǵyn dúkender úshin eleýli shyǵyn baby bolyp tabylady.
Eger júıe jospar boıynsha jumys isteı bastasa, bul birqatar artyqshylyqtar ákeledi: satyp alýshylar kóbirek erkindik alyp, satýshynyń termınalyna táýeldi bolmaıdy; satýshylar birneshe termınaldyń ornyna bir ámbebap termınal ornatý arqyly komısıalyq shyǵyndardy azaıta alady; bankter óz qyzmetteri men sharttaryn jaqsartyp, klıentter úshin básekelesýge májbúr bolady. Sarapshynyń pikirinshe, naryqtyń iri oıynshylary tólem trafıgin joǵaltýǵa jáne klıenttik bazany qaıta bólýge obektıvti túrde múddeli emes, alaıda biryńǵaı QR-dy iske qosý barlyq oıynshylar úshin teń jaǵdaı jasaýy kerek. Endi basty mindet — júıeni beıimdeý kezeńinen tolyqqandy jumys rejımine kóshirý.
Eske salaıyq, Qazaqstanda tólemder men aýdarymdarǵa arnalǵan biryńǵaı QR-kodty áli 2025 jyly iske qosý josparlanǵan edi, biraq tehnıkalyq qıyndyqtarǵa baılanysty kóshýdi keıinge qaldyrýǵa týra keldi.