Qazaqstannyń Ulttyq banki biryńǵaı QR-kodty engizýge qatysty «Ulttyq bank basqarmasynyń keıbir qaýlylaryna ózgerister men tolyqtyrýlar engizý týraly» qaýly jobasyn jarıa talqylaýǵa shyǵardy, dep habarlaıdy infohub.kz saıty.
Qujat «Ashyq NQA» portalynda jarıalanǵan. Joba qabyldanǵan zańdarǵa sáıkes normatıvtik quqyqtyq aktilerge túzetýler engizýdi kózdeıdi. Atap aıtqanda, «Ońaltý jáne bankrottyq týraly» zań aıasynda áreket etetin ákimshige aǵymdaǵy shot ashý úshin qajetti qujattar tizbesi naqtylanady, oǵan boryshkerdiń múlkin satýdan túsken qarajat esepteletin bolady.
Sonymen qatar, ózgerister alımentterdi úshinshi tulǵalardyń óndirip alýynan qorǵaý tártibine qatysty. Ulttyq bankte bul shara azamattardyń jaǵdaıyn jaqsartýǵa baǵyttalǵanyn túsindirdi: kámeletke tolmaǵan balalar men eńbekke qabiletsiz adamdardy asyraýǵa arnalǵan alıment alýshylardyń shottary bankterdiń merzimi ótken qaryzdar boıynsha óndirip alýynan ǵana emes, sot oryndaýshylarynyń óndirip alýynan da qorǵalatyn bolady.
Sondaı-aq, bankaralyq mobıldi tólemder júıesin damytý aıasynda júıeniń jańa servısterin damytýǵa jáne jeke tulǵalar arasyndaǵy operasıalar lımıtin arttyrýǵa baǵyttalǵan ózgerister engizilýde. Ulttyq bank ókilderiniń aıtýynsha, bul bankaralyq servısterdiń halyqqa qoljetimdiligin arttyrady.
Joba 1 qyrkúıekke deıin jarıa talqylaýǵa shyǵarylǵan.