Batys Qazaqstan oblysynda 2026–2027 oqý jylynyń basynda segiz aýyldyń balalary jańa mektepterge ıe boldy. Jeti shaǵyn jınaqty oqý orny jer qoınaýyn paıdalanýshy kompanıanyń qoldaýymen, taǵy bireýi jergilikti búdjet qarajatyna salyndy, dep habarlaıdy infohub.kz.
Aqjaıyq aýdanyndaǵy Keńsýat negizgi orta mektebiniń jańa ǵımaratynyń ashylý saltanatyna oblys ákimi Narıman Tóreǵalıev pen «KPO b.v.» kompanıasynyń bas dırektorynyń orynbasary Muhtar Mankeev qatysty. Keńsýat aýylynda 400-ge jýyq adam turady. Óńir basshysy Qazaqstan prezıdentiniń tapsyrmasy boıynsha bilim berý ınfraqurylymyn damytý jumystary júıeli túrde jalǵasatynyn atap ótti.
«Júıeli jumystyń arqasynda óńirdegi 14 avarıalyq, 6 úsh aýysymdy jáne 12 beıimdelgen mektep ǵımaratynyń máseleleri tolyq sheshildi. Osy mektep qabyrǵasynan óz eline qyzmet etýge daıyn bilimdi, bilikti, belsendi azamattar shyqsyn! Jańa nysan aýyl úshin bilim men tárbıe oshaǵyna, damý men jańa jetistikterge umtylysqa aınalsyn!», — dedi BQO ákimi Narıman Tóreǵalıev.
Jańa mektep 60 orynǵa eseptelgen. Barlyq 10 oqý kabıneti ınteraktıvti paneldermen jabdyqtalǵan. Ǵımaratta sheberhana, kitaphana, asqana, akt zaly jáne sport zaly bar.
Bórli aýdanynyń Aqsaı qalasyndaǵy №9 mektep «Keleshek mektepteri» jobasy aıasynda salyndy. Jańa oqý jylynda nysan 750 oqýshyny qabyldady. 34 synyp qurylyp, 35-ten astam pedagog jumysqa kiristi. Sonymen qatar, mektep 44 oqý kabınetimen jabdyqtalǵan. Olardyń ishinde robototehnıka jáne STEM-zerthanalary bar. Sondaı-aq 150 oryndyq akt zaly jáne úsh sport zaly bar. «Meniń beıinim — fızıka-matematıkalyq jáne shyǵarmashylyq baǵyt. Men ınjenerlik mamandyqqa túskim keledi. Bul mektep zamanaýı talaptarǵa saı bolǵandyqtan, osynda oqyp, jaqsy bilim alyp, bolashaqta suranysqa ıe maman bolamyz dep úmittenemin», — deıdi №9 OM oqýshysy Bıbınýr Qylyshbek.
Báıterek aýdanynyń Ozernoe aýylynda 108 oqýshyǵa arnalǵan jańa mektep ashyldy. Ol «KPO b.v.» kompanıasynyń qarajatyna salyndy. 1961 jyly salynǵan eski beıimdelgen ǵımarat kópten beri zaman talabyna jaýap bermeıtin. Jańa oqý jylynda munda 81 oqýshy bilim alady. Tasqala aýdanynyń Aınabulaq aýylyndaǵy oqý orny 60 orynǵa eseptelgen. Osylaısha, aýyldaǵy burynǵy oqý ornynyń avarıalyq ǵımaraty máselesi sheshildi. Jalpy, oblys boıynsha 2023 jyldan bastap jalpy syıymdylyǵy 12 myń oqýshy ornyn quraıtyn 38 jańa mektep salyndy. Olardyń 90 paıyzy aýyldyq jerlerde ornalasqan. Jańa oqý jylynda oblystaǵy oqýshylar sany 128 myńǵa jýyqtady. 11 myńnan astam bala mektep tabaldyryǵyn alǵash ret attady.