Batys Qazaqstan oblysynda sot ata-anasy qaza tapqan balanyń ájesine ótemaqy tóletti. Nemere ákesi men sheshesinen aıyrylǵan soń ájeıdiń qamqorlyǵyna berilgen edi, dep habarlaıdy infohub.kz.
Batys Qazaqstan oblystyq sotynyń baspasóz qyzmetiniń málimetinshe, óńir turǵyny asyraýshysynyń qaıtys bolýynan keltirilgen materıaldyq zalal men moraldyq zıandy óteýdi, talap qoıýǵa deıingi úsh jyl úshin birjolǵy ótemaqyny, sondaı-aq asyraýshysynan aıyrylýǵa baılanysty aı saıynǵy tólemderdi taǵaıyndaýdy surap, sotqa júgingen.
Anyqtalǵandaı, 2014 jyly talapkerdiń uly jumys mindetterin atqarý kezinde óndiristik jaraqat alyp qaza tapqan. Osylaısha otbasy asyraýshysynan jáne negizgi tabys kózinen aıyrylǵan. 2022 jyly marqumnyń áıeli qaıtys bolyp, talapker kámeletke tolmaǵan nemeresiniń qamqorshysy bolǵan. Talapkerdiń aıtýynsha, uly qaıtys bolǵan kezde ol zeınetker bolǵan, al kelini qaıtys bolǵan soń densaýlyǵy shekteýli (úshinshi top) nemeresine qamqorlyq jasaý mindetin óz moınyna alǵan. Onyń pikirinshe, ol kútiletin ómir súrý uzaqtyǵy kezeńine zalaldy óteýge, al kámeletke tolmaǵan nemeresi 18 jasqa tolǵanǵa deıin nemese eńbekke qabilettiligin alǵanǵa deıin ótemaqy alýǵa quqyly. Sondaı-aq ol moraldyq zıandy óteýdi suraǵan, sebebi buryn otbasy kinálilerden eshqandaı tólem almaǵan.
Dáleldemelerdi zerttegen sot talapty ishinara qanaǵattandyrdy. Marqumnyń asyraýynda kámeletke tolmaǵan uly men anasy bolǵany anyqtaldy; anasy marqumnyń áıeli qaıtys bolǵan soń balanyń jalǵyz zańdy ókili bolǵan. Jumys berýshi men ekinshi uıymnyń kinási jáne olardyń jaýapkershilik dárejesi zańdy kúshine engen sot sheshimimen belgilengen. Ótemaqy mólsherin aıqyndaý kezinde marqumnyń ortasha aılyq jalaqysy jáne jumys berýshiniń buryn áıeline tólegen 5 mln teńge kólemindegi ótemaqysy eskerilgen.
Nátıjesinde sot jumys berýshiden talapkerdiń paıdasyna: talap qoıýǵa deıingi úsh jyl úshin birjolǵy zıandy óteý — 1,6 mln teńge; ómir boıy aı saıynǵy tólemder — 45 myń teńge; moraldyq zıandy óteý — 1,5 mln teńge óndirdi. Kámeletke tolmaǵan balanyń paıdasyna: birjolǵy zıandy óteý — 1,6 mln teńge; 18 jasqa deıin aı saıynǵy tólemder — 32 myń teńge; moraldyq zıandy óteý — 1,5 mln teńge.
Ekinshi kináli uıymnan talapkerdiń paıdasyna: birjolǵy zıandy óteý — 980 myń teńge; ómir boıy aı saıynǵy tólemder — 27 myń teńge; moraldyq zıandy óteý — 1 mln teńge óndirildi. Balanyń paıdasyna: birjolǵy zıandy óteý — 980 myń teńge; 18 jasqa deıin aı saıynǵy tólemder — 27 myń teńge; moraldyq zıandy óteý — 1 mln teńge.
«Sot qabyldaǵan sheshim áleýmettik ádilettilikti qamtamasyz etýge, marqum jumysshynyń otbasy músheleriniń buzylǵan quqyqtaryn qalpyna keltirýge, sondaı-aq densaýlyǵy shekteýli kámeletke tolmaǵan balanyń jáne onyń zańdy ókiliniń múddelerin qorǵaýǵa baǵyttalǵan. Sot sheshimi zańdy kúshine endi», — dep habarlady sottan.