Qazaqstan men Ózbekstan halyqaralyq kapıtaldyń nazaryna jıi iligýde: BlackRock Investment Institute Ortalyq Azıanyń eki iri ekonomıkasyn Úndistanmen jáne Parsy shyǵanaǵy memleketterimen bir qatarda qarastyrýda. Bul týraly ınstıtýttyń bas strategi Ben Paýell Bloomberg agenttigine aıtyp berdi, dep habarlaıdy infohub.kz saıty.
Paýelldiń aıtýynsha, Qazaqstan men Ózbekstan qazir ınvestorlar úshin «shynymen de qyzyqty». Qazaqstanda BlackRock erekshe nazar aýdaratyn nárse — júrgizilip jatqan reformalar, sonyń ishinde zeınetaqy júıesi men kapıtal naryǵyndaǵy ózgerister.
Paýell eldegi ózgerister onyń kapıtal úshin tartymdylyǵyn arttyratynyn atap ótti.
«Qazaqstan kapıtal úshin tartymdy bola túsýde, al el paıda kórgen saıyn ol odan ári tartymdy bolady. Eger múmkindikter kóbeıse, biz munda kóbirek kapıtal baǵyttaýǵa qýanamyz», – dedi Paýell.
Ózbekstanda da BlackRock jańa múmkindikter izdestirýdi jalǵastyrýda. Strategtiń aıtýynsha, kompanıa aldaǵy ýaqytta olardyń sany artýy múmkin dep kútedi.
Bloomberg ınvestorlardyń Ortalyq Azıaǵa degen qyzyǵýshylyǵynyń artýyn aımaqtyń ekonomıkalyq ósimimen, júrgizilip jatqan ózgeristermen jáne resýrstyq bazasymen, sonyń ishinde asa mańyzdy mıneraldar qorymen baılanystyrady.
Bloomberg dereginshe, 2026 jyldyń basynan beri sheteldik ınvestorlar Qazaqstannyń teńgemen nomınasıalanǵan boryshtyq quraldaryna shamamen 2 mlrd dollar salǵan.
El sondaı-aq ınfraqurylymdy aýqymdy jańartý úshin qarjy tartýda. Agenttik qarastyrylyp jatqan nusqalardyń qatarynda ulttyq temirjol operatorynyń aksıalaryn ornalastyrýdy jáne Azıa ınfraqurylymdyq ınvestısıalar bankiniń qarajatyn tartýdy ataıdy.
Buǵan deıin Qazaqstan men Qytaı ınvestısıa tartý úshin birlesken qor quratyny belgili bolǵan.