Astanada bloger Erbolat Janabylov jubaıy Elmıra Tólegenovamen bolǵan turmystyq janjaldan keıin ákimshilik jaýapkershilikke tartyldy. Bul týraly Astana qalalyq polısıa departamentiniń baspasóz qyzmeti habarlady, dep jazady infohub.kz saıty.
Vedomstvonyń naqtylaýynsha, aǵymdaǵy jyldyń 30 qyrkúıeginde polısıa qyzmetkerleri áleýmettik jelilerdi monıtorıńteý barysynda Threads áleýmettik jelisinde bloger E.T.-nyń jubaıy E.J.-men bolǵan janjal faktisi týraly beınejazbasy bar jarıalanymdy anyqtaǵan.
Polısıada atap ótkendeı, beınejazbada áıel bolǵan janjaldyń mán-jaıyn aıtyp, qoldaryndaǵy qyzarýdy kórsetken.
«Osy fakti boıynsha oqıǵa ornyna polısıa qyzmetkerleri bardy. Tekserý barysynda jubaılar arasynda turmystyq janjal bolǵany anyqtaldy. Bul rette E.T. polısıaǵa aryz berýden bas tartty. Sonymen qatar J.E.-ge qatysty otbasylyq-turmystyq qatynastar salasyndaǵy quqyqqa qarsy áreketteri úshin ákimshilik materıal jasaldy. Er adam ákimshilik jaýapkershilikke tartylyp, ýaqytsha ustaý bólmesine qamaldy», — dedi quqyq qorǵaý organdary.
İs materıaldary sheshim qabyldaý úshin sotqa joldandy.
Polısıa sondaı-aq aǵymdaǵy jyldyń 28 tamyzynda er adam probasıalyq baqylaý talaptaryn buzǵanyn — túngi saǵat 22:00-den keıin ózi kórsetken turǵylyqty jerinde bolmaǵanyn, buzý faktisi boıynsha materıaldar sotqa jiberilgenin atap ótti.
Eske salaıyq, bloger Elmıra Tólegenova áleýmettik jelilerdegi úndeýinde Erbolat Janabylovpen ajyrasyp jatqanyn aıtqan. Sondaı-aq ol jubaıymen bolǵan jýyrdaǵy janjalǵa qatysty pikir bildirgen.
Sonymen qatar, 27 sáýirde blogerlerge qatysty úkim shyǵarylǵanyn eske salamyz. Sýdıa prokýror usynǵan merzimdermen kelisti — blogerler zańsyz kásipkerlik jáne qylmystyq jolmen alynǵan aqshany jáne (nemese) ózge múlikti zańdastyrý (jylystatý) boıynsha kináli dep tanyldy.
Sot sondaı-aq Janabylov pen Tólegenova qylmystyq qarajatqa satyp alǵan iPhone 16 (17 dana) jáne Hyundai Elantra (8 dana) avtokóligin tárkileýge úkim shyǵardy.