TikTok-ta 2,3 mln-nan astam jazylýshysy bar belgili bloger ınternette ózi qatysqan vıdeo paıda bolǵannan keıin jaýapkershilikke tartyldy, dep habarlaıdy infohub.kz.
«Kozachkov offside» Telegram arnasynda Mańǵystaý oblysynda qyzdardyń ózderiniń quqyq buzýshylyqtary túsirilgen vıdeony ınternetke júktegeni týraly habarlama jarıalandy. Jazbada: «Mańǵystaý oblysynyń joldarynda shapqylap júrgen qyzdarǵa óz qurmetimdi bildirgim keledi. Olar ózderiniń quqyq buzýshylyqtaryn vıdeoǵa túsirip, júktedi, ıaǵnı ózderiniń azamattyq ustanymyn jáne zań buzýshylyqqa tózbeýshiligin kórsetti», — delingen.
Jazbaǵa Instagram jáne TikTok-ta tanymal, Nagidollayevna logınimen kontent jarıalaıtyn Janýlá esimdi blogerdiń vıdeo tirkelgen. Onyń Instagram-da 410 myńnan astam, al TikTok-ta 2,3 mln jazylýshysy bar.
infohub.kz tilshisi Mańǵystaý oblysy Polısıa departamentiniń baspasóz qyzmetine suraý joldady. Áleýmettik jelilerdi baqylaý barysynda polısıa qyzmetkerleri júrgizýshilerdiń jolaýshylardy qaýipsizdik talaptaryn buza otyryp tasymaldap, jol júrý erejesin óreskel buzǵan vıdeo jazbalaryn anyqtaǵany belgili boldy.
«Júrgizýshilerdiń jeke basy anyqtaldy. Olar jolaýshylardy tasymaldaý kezinde jol júrý erejesiniń talaptaryn saqtamaǵany, júris aldynda jáne manevr jasaý kezinde sıgnal berý talabyn oryndamaǵany, sondaı-aq kólik qozǵalysyna kedergi keltirgeni úshin ákimshilik jaýapkershilikke tartyldy. Sonymen qatar, kólikte bolǵan jolaýshylardyń jeke basy anyqtaldy. Olarǵa da qoldanystaǵy zańnamaǵa sáıkes shara qoldanylady», — dep habarlady polısıadan.
Kólik quraldary mamandandyrylǵan aıyppul turaǵyna ornalastyryldy.