2025 jyldyń qorytyndysy boıynsha Qazaqstandaǵy eń iri kómir óndirýshi kompanıa «Bogatyr Komır» taza paıdasyn 29,1 mlrd teńgege jetkizip, bul kórsetkish aldyńǵy jylmen salystyrǵanda 43 esege ósken. 2024 jyly bul kórsetkish 677 mln teńge bolǵan edi, dep habarlaıdy infohub.kz saıty.
Qarjylyq eseptilikke sáıkes, kompanıanyń jyldyq tabysy 38,8 paıyzǵa artyp, 138,5 mlrd teńgeden 192,2 mlrd teńgege jetken. Jalpy paıda 26,1 mlrd teńgeden 61 mlrd teńgege deıin ósken.
Kásiporynnyń operasıalyq paıdasy ótken jylǵy 6,4 mlrd teńgemen salystyrǵanda 40,4 mlrd teńgeni qurady. Salyq salynǵanǵa deıingi paıda 35,9 mlrd teńge bolsa, 2024 jyly bul kórsetkish 662 mln teńgeden aspaǵan.
Sondaı-aq eseptilikte 2025 jyly kompanıanyń jalǵyz qatysýshysy – Forum Muider Limited – Kıprden «Astana» halyqaralyq qarjy ortalyǵyna redomısılásıalaýdy aıaqtaǵany kórsetilgen.
Budan bólek, Forum Muider Limited kompanıasynyń ıeleri qurylymy ózgergen. 2025 jyldyń sońynda «Samuryq-Energo» men reseılik «RÝSAL» úlesteri 35 paıyzǵa deıin tómendegen (buryn olardyń árqaısysy 50 paıyzǵa ıe bolǵan), al 30 paıyzǵa qatarlyq Primet LLC ıe boldy.
Buǵan deıin Forbes habarlaǵandaı, Primet LLC kompanıasynyń eki quryltaıshysy bar – Jozef Nazıh Karam jáne Prime Mining and Energy. Sońǵysy BAÁ-niń erkin ekonomıkalyq aımaǵynda tirkelgen.
«Bogatyr Komır» Pavlodar oblysyndaǵy Ekibastuz kómir ken ornynda ashyq ádispen kómir óndirýmen aınalysady. Kompanıa «Bogatyr» jáne «Severnyı» kenishterinde jumys isteıdi. Kómir óndirýge arnalǵan kelisimshart 2002 jyly 45 jyl merzimge jasalǵan.
Buǵan deıin «Kýrsıv» Qazaqstannyń Ekibastuz kómirin Reseıge jetkizýdi arttyratynyn jazǵan bolatyn.