Bolgarıa bıligi jekemenshik qorǵanys kompanıasyna tıesili oq-dári qoımasynda túnde shyqqan órttiń sebebin tergep jatyr. İshki ister mınıstri Ivan Demerdjıevtiń aıtýynsha, bılik ortalyq Bolgarıadaǵy oqıǵaǵa «syrtqy aralasýdy joqqa shyǵarmaıdy». Órtten eshkim zardap shekpedi, alaıda tizbekteı jarylystar bolǵan. Bul týraly infohub.kz saıty habarlaıdy.

Ýkraına basqynshy Reseı kúshterine qarsy qoldanyp júrgen qarýyn shyǵaratyn EMCO kompanıasy óz nysanyndaǵy órtti dıversıa dep atap, adam faktoryn «tolyq joqqa shyǵardy». Alaıda kimniń jaýapty bolýy múmkin ekenin naqtylamady.

Bul oqıǵa ótken aıda sol óńirdegi EMCO-nyń taǵy bir oq-dári qoımasynda bolǵan órt pen jarylystardan keıin tirkeldi. Kompanıa málimdemesinde bul joly órtengen qoıma — astana Sofıadan shamamen 170 shaqyrym shyǵysta, ortalyqtaǵy Gornı Vyrpıshta aýylynyń mańynda — birneshe aı boıy paıdalanylmaǵanyn, al 20 kún buryn tekserilip, barlyq talaptarǵa tolyq sáıkestigi rastalǵanyn atap ótti.

EMCO 2011 jyldan beri bolgar qorǵanys kásiporyndarynda oryn alǵan birqatar uqsas oqıǵalardy mysalǵa keltirip, sońǵysy «bolgar qorǵanys ónerkásibine qarsy dıversıa áreketteri qatarynan tys qalmaǵanyn» málimdedi.

«Osyndaı áreketterden eń aýyr zardap shekken Eýroodaq pen NATO-ǵa múshe memleket retinde Bolgarıa bul shabýyldardyń aldyn alý men olardy zalalsyzdandyrý jónindegi ujymdyq kúsh-jigerge qosylýy tıis», — delingen kompanıa málimdemesinde.

Kompanıany bolgar qarý satýshysy Emılıan Gebrev basqarady. Bolgarıa prokýratýrasy onyń buryn da reseılik agentterdiń nysanasyna aınalǵanyn alǵa tartady. Atap aıtqanda, 2015 jyly Gebrevti, onyń ulyn jáne kompanıanyń taǵy bir qyzmetkerin ýlaý áreketi bolǵan — keıin úsh reseılik azamatqa óltirýge oqtalý boıynsha syrttaı aıyp taǵyldy.

Bolgarıa — 2022 jyly bastalǵan tolyq aýqymdy reseılik basqynshylyqqa toıtarys berip jatqan Ýkraınaǵa qarý-jaraqtyń iri jetkizýshisi. Sofıa jaqynda memlekettik qarý jetkizýin toqtatqanymen, bolgar jekemenshik qorǵanys kompanıalary mundaı tasymaldardy jalǵastyryp otyr.

Reseı sońǵy kezde Eýropa boıynsha dıversıalyq naýqanyn kúsheıtken sıaqty. Ótken aptada Germanıa tamyzda Leıpsıg áýejaıynda bolǵan dron shabýylyna Reseı jaýapty dep málimdedi — Máskeý bul aıypty «absýrd» dep joqqa shyǵardy.

Italıadan Estonıaǵa deıingi qorǵanys nysandarynda da birqatar kúdikti órt oryn aldy, zardap shekken keıbir elder Reseıdi aıyptap otyr.