Bolıvıadaǵy áskerı kazarmada bolǵan jarylystan keminde eki adam qaza taýyp, ondaǵan adam jaraqat aldy. Bul týraly infohub.kz saıty habarlaıdy.
Jarylys jergilikti ýaqyt boıynsha juma kúni saǵat 14:30-da (Grınvıch boıynsha 18:30) Vıacha qalasyndaǵy artılerıalyq polk ornalasqan kazarmada boldy. Bolıvıanyń qorǵanys mınıstri Ernesto Hýstınıanonyń málimetinshe, jarylys "pırotehnıkalyq materıaldardyń" tutanýynan oryn alǵan. Qazirgi ýaqytta keminde 58 adam jaraqat alǵany belgili.
Densaýlyq saqtaý mınıstrliginiń ókili Rıta Nebraska jergilikti telearnaǵa bergen suhbatynda qaza tapqandar sany 10-15 adamǵa jetýi múmkin ekenin aıtty. Bul aqparatty Reuters agenttigi taratty. Jarylys La-Pastan shamamen 30 shaqyrym jerde ornalasqan Vıacha qalasynda boldy.
Polısıanyń habarlaýynsha, jarylys saldarynan ondaǵan úı zaqymdanǵan, negizinen terezeler synǵan. Qutqarýshylar qıraǵan úıindiler astynan adamdardy izdestirý jumystaryn júrgizýde. Nebraska taǵy da jarylys bolý qaýpi bar ekenin eskertip, turǵyndardy áskerı bazadan keminde 150 metr qashyqtyqta bolýǵa shaqyrdy.
Polısıa ókili Rodjer Rokanyń AFP agenttigine aıtýynsha, kazarmada feıerverkter saqtalǵan, jarylystyń sebebi áli tergelýde. Vıacha bıligi úsh kúndik aza tutý jarıalady.