Jer júzin qan basqanda,
Kóbigi shyǵyp aspanǵa,
Jyn joldas bop adamǵa,
Týralyq, teńdik umytylyp,
İnjid, quran jyrtylyp,
Jatqanda jerde - tabanda.
Qyzyl qanǵa mas bolyp,
Júregi qara tas bolyp,
Aırylyp esten adamzat,
Umytyp meırimdi ıesin,
Soıyp salyq túıesin,
Táńirisi bop Lat, Manat,
Júrgizip ibilis ámirin,
Jaýyzdyq jaıyp tamyryn,
Órship ótirik, dushpandyq...
... Kók esigi ashyldy,
Jumaq nury shashyldy,
Keldi ushyp bostandyq.
Ǵarysh nurly júzi bar,
Káýsar, jibek sózi bar,
Ádemi, almas aq qanat.
Janýarlar jerdegi,
Yntasy - jaqyn kórmegi,
Tańyrqady antalap.
Appaq nurǵa oranyp,
Aqyryn ǵana dem alyp,
Qurmetpenen turysty.
Sáýle kórmeı, shekken zar,
Ash-jalańash sorlylar
Qýanysty, kúlisti.
Tez jalyndap sýynǵan,
Jumaqtan da qýylǵan,
Adamzat bir áýrede.
Esin jıyp kúılenip,
Ábden boıy úırenip
Alǵannan soń sáýlege,-
Baıaǵysyn bastady,
Ujdandy bylaı tastady,
Bostandyqta joq jumys.
Zar eńiredi talaı jan,
Sel bop aqty qyzyl qan,
Ótirik, talaý, óltiris.
Shirik júrek sasyqtar,
Aramdyqqa asyqtar
Jetildi, jetti muratqa.
Qybyrlaǵan qońyzdar,
Qorsyldaǵan dońyzdar
Kókten kelgen qonaqqa
Tilin, qolyn tıgizdi,
«Sasyq saıtan» degizdi,
Jaýyzdyq taǵy órledi.
İzgi elshisi jumaqtyń -
Qasıetti qonaqtyń
Aq qanatyn kirledi.
Qybyrlaǵan qońyzdar,
Qorsyldaǵan dońyzdar,
Tilegiń boldy - qýan, qul.
Bostandyq - izgi perishte
Ketpekke ushyp ǵaryshqa,
Aq qanatyn qomdap tur.

---