Mańǵystaý oblysynda otbasylyq dastarqannan keıin botýlızm belgilerimen úsh eresek adam men bir bala jansaqtaý bólimine jatqyzyldy, dep habarlaıdy infohub.kz saıty.
Oblystyq densaýlyq saqtaý basqarmasynyń bas shtattan tys epıdemıology Maral Qadyrdyń aıtýynsha, Munaıly aýdanynyń úsh eresek turǵyny oblystyq kópbeıindi aýrýhanaǵa jetkizilgen. Taǵy bir naýqas — 9 jas 10 aıdaǵy bala — keshke oblystyq balalar kópbeıindi aýrýhanasynyń ınfeksıalyq bólimine túsken.
Aldyn ala kúdikti ónim retinde úı jaǵdaıynda daıyndalǵan sýyq ystalǵan balyq sanalady. Epıdemıologtyń dereginshe, balyq uzaq ýaqyt tońazytqyshta saqtalǵan. Barlyq zardap shekkender ony 17 qyrkúıekte shamamen 20:00-den 21:00-ge deıin otbasylyq is-shara barysynda tutynǵan.
Aýrýdyń alǵashqy belgileri 18 qyrkúıekte keshke paıda bolǵan. Naýqastar 19 qyrkúıekte medısınalyq kómekke júgingen.
«Zardap shekkenderdiń úıinde birneshe ret júrek aıný men qusý baıqalǵan. Aýrýhanaǵa jatqyzylǵannan keıin naýqastardyń jaǵdaıy aýyr dep baǵalandy. Negizgi sımptomdardyń qatarynda — álsizdik, bas aınalý, jutý men kórýdiń buzylýy, tamaqtyń qyshýy men qurǵaýy, kózdiń bulyńǵyrlanýy men qosarlanyp kórinýi, sondaı-aq sananyń buzylýy», — dedi Maral Qadyr.
Barlyq naýqastar aýyr jaǵdaıda jatyr jáne ókpeni jasandy jeldetý apparattaryna qosylǵan. Olarǵa dezıntoksıkasıalyq jáne sımptomatıkalyq em júrgizilýde. Sondaı-aq naýqastarǵa spesıfıkalyq qarsy botýlındik sarysý egildi.