Mańǵystaý oblysynda Kaspıdegi oqý-jattyǵý kezinde qaza tapqan, zardap shekken jáne habar-osharsyz ketken áskerı qyzmetshiler týraly derekter naqtylandy. Sońǵy málimet boıynsha, aýa raıy qolaısyz kezde ashyq teńizge 17 adam aǵyzylyp ketken. Olardyń 12-si qaza tapty, úsheýin qutqarý múmkin boldy, taǵy ekeýiniń orny ázirge belgisiz, dep habarlaıdy infohub.kz saıty.
Premer-mınıstrdiń orynbasary Qanat Bozýmbaev basqarǵan úkimettik komısıa tótenshe jaǵdaı ornynda jumysyn bastap ketti. Qazir ol izdeý jumystaryn úılestirip otyr.
«Qanat Bozýmbaev joǵalǵan áskerı qyzmetshilerdi barlyq qajetti kúsh pen quraldy tarta otyryp, táýlik boıy úzdiksiz izdeýdi qamtamasyz etýdi tapsyrdy. Sondaı-aq qaza tapqan áskerılerdiń otbasylaryna qajetti materıaldyq jáne ózge de kómek kórsetý tapsyryldy», — dedi Mańǵystaý oblysy ákimdiginde.
Qaıǵyly oqıǵanyń hronıkasy bylaı: 24 qyrkúıekte áskerı qyzmetshiler Kaspı teńiziniń jaǵalaýynda oqý-jaýyngerlik tapsyrmany oryndap jatty. Qorǵanys mınıstrliginiń dereginshe, aýa raıy kúrt nasharlap, jel kúsheıgen. Áskerılerdi ashyq teńizge aǵyzyp áketken.
Qutqarylǵan úsh áskerıdiń bireýi Mańǵystaý oblystyq kópbeıindi aýrýhanasyna jetkizildi. Dárigerler onyń jaǵdaıyn turaqty aýyr dep baǵalap otyr.
Áskerı qyzmetshilerdiń qaza tabý faktisi boıynsha qylmystyq is qozǵaldy. Prezıdent Qasym-Jomart Toqaev olardyń týǵan-týystaryna kóńil aıtyp, 25 qyrkúıekti jalpyulttyq aza tutý kúni dep jarıalady.