Vıse-premer Qanat Bozýmbaev bastaǵan úkimettik komısıa Manǵystaý oblysyna keldi. Ol prezıdenttiń tapsyrmasymen áskerı qyzmetshilerdiń oqý-jattyǵý kezinde qaza tabý mán-jaıyn tergeý úshin qurylǵan, dep habarlaıdy infohub.kz saıty.
Komısıa quramyna qorǵanys mınıstri, oblys ákimi, bas áskerı prokýror, shekara qyzmetiniń ókilderi jáne alty mınıstrliktiń basshylary endi. Olar oqıǵa ornyndaǵy ahýaldy zerttep, memlekettik organdardyń budan keıingi is-qımylyn aıqyndaýy tıis.
«Qaza tapqandardyń otbasylaryna qajetti kómek kórsetýge, bolǵan oqıǵanyń mán-jaıyn anyqtaýǵa, sondaı-aq tartylǵan memlekettik organdar men qyzmetterdiń is-qımylyn úılestirýge erekshe nazar aýdarylady. Komısıa jumysy oqıǵa ornynda jalǵasýda», — delingen oblys ákimdiginiń habarlamasynda.
Qaıǵyly oqıǵa 24 qyrkúıekte Kaspı teńiziniń jaǵalaýynda Áskerı-teńiz kúshteriniń áskerı qyzmetshileri oqý-jaýyngerlik tapsyrmany oryndap jatqanda boldy. Qorǵanys mınıstrliginiń dereginshe, aýa raıy kúrt nasharlap, qatty jel turyp, 19 adam teńizge ushyp ketken.
Vedomstvo toǵyz áskerı qyzmetshiniń qaza tapqanyn habarlady. Úsheýin qutqaryp qalý múmkin boldy, olardyń bireýi aýrýhanaǵa jatqyzyldy. Qalǵandaryn izdeý jalǵasty. Operasıaǵa áskerı teńizshiler, TJM qutqarýshylary jáne avıasıa qatysty.
Áskerılerdiń qaza tabýy boıynsha qylmystyq is qozǵaldy. Tergeýshiler bolǵan oqıǵanyń mán-jaıyn anyqtap, saraptamalar júrgizýde. Prezıdent Qasym-Jomart Toqaev qaza tapqandardyń otbasylaryna kóńil aıtty. 25 qyrkúıekti jalpyulttyq aza tutý kúni dep jarıalady.