Qazaqstan Premer-mınıstriniń orynbasary Qanat Bozymbaev Kaspı teńizindegi qaıǵyly oqıǵaǵa kináli barlyq laýazymdy tulǵalar jazaǵa tartylatynyn málimdedi, dep habarlaıdy infohub.kz saıty.
Qazaqstan Respýblıkasy Premer-mınıstriniń orynbasary Qanat Bozymbaevtyń resmı málimdemesi Mańǵystaý oblysy ákimdiginiń Telegram-arnasynda jarıalandy.
«Búgin elimiz aýyr qazaǵa ushyrady. Mańǵystaý oblysyndaǵy qaıǵyly oqıǵa saldarynan 12 áskerı qyzmetshimiz qaza tapty, úsheýin aman alyp qalý múmkin boldy, qalǵan ekeýin izdeý jalǵasýda. Memleket basshysy Qasym-Jomart Kemeluly Toqaev qaza tapqan sarbazdar men ofıserlerdiń otbasylaryna, týǵan-týystaryna tereń ári shynaıy kóńil aıtady. Prezıdent pen búkil qazaq halqy sizderdiń orny tolmas qaıǵylaryńyzdy bólisedi», — dedi Bozymbaev.
Ol bolǵan oqıǵaǵa baılanysty ýákiletti organdar qylmystyq is qozǵaǵanyn eske saldy. Onyń aıtýynsha, tergeý barynsha muqıat, obektıvti jáne qysqa merzimde júrgiziledi.
«Áreketi nemese áreketsizdigi osy qaıǵyly oqıǵaǵa ákep soqqan barlyq laýazymdy tulǵalar zańnyń barlyq qatańdyǵymen jazalanady. Memleket qaza tapqandardyń otbasylaryn bul qaıǵymen jalǵyz qaldyrmaıdy. Qaza tapqan árbir áskerı qyzmetshiniń otbasyna iri kólemde materıaldyq kómek kórsetilip, qajetti qoldaýdyń barlyǵy beriledi», — dep qosty Bozymbaev.
Premer-mınıstrdiń orynbasary tergeý barysy men otbasylarǵa kómek kórsetý óziniń jeke baqylaýynda ekenin de atap ótti.
Eske salaıyq, 24 qyrkúıekte Mańǵystaý oblysynda Qazaqstan Respýblıkasy Qarýly Kúshteriniń Áskerı-teńiz kúshteriniń oqý-jattyǵýy kezinde Kaspı teńiziniń jaǵalaýynda aýa raıynyń kúrt nasharlaýy men jeldiń kúsheıýi saldarynan áskerı qyzmetshiler teńizge aǵyzylyp ketti.
Alǵashynda teńizge 19 áskerı qyzmetshi aǵyzylyp ketkeni jáne 9 áskerı qyzmetshiniń qaza tapqany birden rastalǵany habarlandy. Bas prokýratýra Aqtaý garnızonynda qylmystyq is qozǵalyp, tergelip jatqanyn málimdedi.
Áskerı qyzmetshilerdiń qaza tabýynan keıin úkimettik komısıa qurylyp, tótenshe oqıǵa ornyna Premer-mınıstrdiń orynbasary Qanat Bozymbaev jiberildi. Prezıdent Qasym-Jomart Toqaev Mańǵystaý oblysynda áskerı qyzmetshilerdiń qaza tabýyna baılanysty kóńil aıtyp, qaıǵyly oqıǵany tergeý jóninde tapsyrmalar berdi.
Aqtaýda Qala kúnine oraı merekelik is-sharalar toqtatyldy. Qasym-Jomart Toqaev 25 qyrkúıekti Qazaqstanda jalpyulttyq aza tutý kúni dep jarıalady.
24 qyrkúıek keshinde Premer-mınıstrdiń orynbasary Qanat Bozymbaevtyń basshylyǵymen komısıa Mańǵystaý oblysyna keldi. Kaspı teńizindegi oqý-jattyǵý kezinde qaza tapqandardyń týystary Aqtaýdaǵy máıithanaǵa denelerdi taný úshin keldi.
24 qyrkúıek keshinde naqtylanǵan derekter belgili boldy: teńizge 17 adam aǵyzylyp ketti, olardyń 12-si qaza tapty, úsheýin aman alyp qalý múmkin boldy. Qalǵan eki áskerı qyzmetshini izdeý jalǵasýda.
Sondaı-aq Qorǵanys mınıstrligi Kaspı teńizindegi oqý-jattyǵý kezinde qaza tapqan áskerılerdiń tizimin jarıalady. Tizimge 11 matros jáne bir aǵa leıtenant endi.