Batys Qazaqstan oblysynyń Bórli aýdanynda prokýratýranyń aralasýymen 16-17 jastaǵy 1155 kámeletke tolmaǵan balanyń quqyǵy qalpyna keltirildi. Endi olar qoǵamdyq kólikte jol júrýge 50 paıyz jeńildik alady, dep habarlaıdy infohub.kz saıty.
Buzýshylyq aýdandyq máslıhattyń taksıden basqa, qalaishilik qoǵamdyq kólikte jekelegen sanattaǵy jolaýshylarǵa jeńildikti jol júrý týraly sheshimin taldaý barysynda anyqtaldy. Qujatta 16-17 jastaǵy kámeletke tolmaǵandarǵa jeńildik qarastyrylmaǵan, sondyqtan osy jas tobyndaǵy oqýshylar jol júrýdiń tolyq qunyn tóleýge májbúr boldy.
Prokýratýranyń aktisi boıynsha máslıhat sheshimine ózgerister engizildi. Endi Aqsaı qalasynda kámeletke tolmaǵan jolaýshy úshin jol júrý quny 50 teńgeni quraıdy.
Aýdannyń basqa da baǵyttarynda jeńildikti tarıf belgilendi: kámeletke tolmaǵandar úshin jol júrý quny 50%-ǵa tómendetildi.
Prokýratýrada kámeletke tolmaǵandardyń quqyqtary men zańdy múddelerin qorǵaý jáne zańnama talaptarynyń saqtalýyn qamtamasyz etý jumystary jalǵasyp jatqanyn atap ótti.
Buǵan deıin «Kýrsıv» Astanada kúndizgi oqý nysanyndaǵy balalarǵa, sonyń ishinde jekemenshik mektep oqýshylaryna tegin jol júrý quqyǵyn keńeıtý maquldanǵanyn jazǵan. Sondaı-aq ózgerister az qamtylǵan otbasylardyń balalary úshin jeńildiktiń jyl boıy, onyń ishinde kanıkýl kezinde de áreket etýin qarastyrǵan.