Batys Qazaqstan oblysynda jubaıynyń júıeli túrde ishimdik ishýi men agressıvti minez-qulqyna baılanysty otbasy ydyrady. Bul týraly infohub.kz saıty habarlaıdy.
Oblystyq sottardyń Telegram-arnasynda málim bolǵandaı, talap qoıýshy áıel sotqa nekeni buzý týraly aryzdanǵan. Ol óz talabyn jaýapkerdiń únemi ishimdik iship, agressıvti minez kórsetýi jıi janjal men urys-keriske ákelip soǵatynyn alǵa tartyp negizdegen. Talap qoıýshynyń pikirinshe, mundaı jaǵdaı kámeletke tolmaǵan balalardyń psıhologıalyq jáne fızıkalyq damýyna keri áser etýi múmkin.
Jubaılar 2019 jyldan beri nekede turǵan. Otbasynda alty, úsh jáne bir jasar úsh bala tárbıelenýde.
Sot otyrysynda jaýapker ishimdik ishetinin moıyndap, otbasyn saqtap qalǵysy keletinin aıtyp, tatýlasý úshin qosymsha ýaqyt surady. Alaıda sot belgilegen merzimde taraptar tatýlaspady.
Sot 2026 jylǵy 23 mamyrdan bastap jubaılar birge turmaıtynyn, ortaq sharýashylyq júrgizbeıtinin, otbasylyq qatynastar toqtaǵanyn anyqtady. Talap qoıýshy nekeni buzýdy talap etti.
Qazaqstan Respýblıkasy Joǵarǵy Sotynyń normatıvtik qaýlysyna sáıkes, eger sot bergen merzim ótken soń jubaılar tatýlaspasa jáne olardyń keminde bireýi nekeni toqtatýdy talap etse, sot nekeni buzady.
Kámeletke tolmaǵan balalardyń múddesin eskere otyryp, sot olardyń turǵylyqty jerin anasymen birge anyqtady. Sonymen qatar sot bólek turatyn ata-ananyń balalarmen qarym-qatynas jasaýǵa quqyly ekenin jáne olardy tárbıeleýge qatysýǵa mindetti ekenin túsindirdi.
Qazaqstan Respýblıkasynyń «Neke (erli-zaıyptylyq) jáne otbasy týraly» kodeksine sáıkes ata-ana óziniń kámeletke tolmaǵan balalaryn asyraýǵa mindetti. Úsh jáne odan da kóp balaǵa alıment ata-ananyń jalaqysynyń jáne (nemese) ózge de tabysynyń jartysy mólsherinde óndiriledi.
Osyǵan baılanysty sot jaýapkerden talap qoıýshynyń paıdasyna úsh kámeletke tolmaǵan balany asyraýǵa alıment óndirdi. Alıment óndirý týraly sheshim dereý oryndalýǵa jatady.
Jubaılar ortaq múlikti bólý týraly talap qoımaǵan. Sot sheshimi zańdy kúshine engen joq.