Batys Qazaqstan oblysynda Úlken Ózen ózenine kólemi 28,4 mln tekshe metr sý qoımasyn salý josparlanyp otyr. Qazaqstannyń Sý resýrstary jáne ırrıgasıa mınıstrliginiń málimetinshe, jańa nysan 12 myń ga lımandy sýmen qamtamasyz etedi, al keleshekte sýarmaly alqap 20 myń ga-ǵa deıin ulǵaıýy múmkin, dep habarlaıdy infohub.kz saıty.
Jobanyń bastalǵany týraly vedomstvo basshysy Nurjan Nurjigitov Oral qalasynyń turǵyndarymen kezdesýde aıtty.
2025 jyly Batys Qazaqstan oblysy Qaztalov aýdanynyń ákimdigi sý qoımasynyń qurylysyn 8,7 mlrd teńgege baǵalaǵan. Onda jobalaý-smetalyq qujattamanyń daıyn ekeni atap ótildi. Joba Islam damý bankiniń qoldaýymen júzege asyrylady.
«Batys Qazaqstan oblysynda iske asyrylyp jatqan jobalar sýdy turaqty berýge, onyń joǵalýyn azaıtýǵa, aýyl sharýashylyǵy jerlerin tıimdirek sýarýǵa jáne eldi mekenderdi sý tasqynynan qorǵaýǵa baǵyttalǵan», — dedi Nurjan Nurjigitov.
Jańa sý qoımasynan bólek, banktiń qoldaýymen óńirde Bıtik sý qoımasy men tórt magıstraldy kanaldy qaıta jańǵyrtý josparlanyp otyr. Mınıstrliktiń esepteýinshe, bul shamamen 28,5 myń ga jerdiń sýmen qamtamasyz etilýin jaqsartady. Barlyq jobada sýdy avtomatty túrde esepke alý qarastyrylǵan.
Kezdesýde turǵyndar mınıstrge shaǵyn ózenderdiń sarqylýynan qorǵaý, sý aıdyndarynyń lastanýy jáne gıdrotehnıkalyq qurylystardyń jaı-kúıi týraly suraqtar qoıdy. Azamattardy jeke qabyldaǵannan keıin Nurjigitov beıindi komıtetter men departamentterdiń basshylaryna tapsyrmalar berdi.
Buǵan deıin «Kýrsıv» 2030 jylǵa deıin Qazaqstanda 42 jańa sý qoımasy salynatynyn, alaıda qazir olardyń tek úsheýi ǵana daıyn ekenin habarlaǵan.