Fransýz sýretshisi Anrı Matıstiń San-Paýlý kitaphanasynan urlanǵan segiz ılústrasıasyn Brazılıa polısıasy tapty. Bul týraly infohub.kz habarlady.
Quny shamamen 200 myń dollar (148 myń fýnt sterlıń) baǵalanatyn týyndylar beısenbi kúni qalanyń ońtústigindegi San-Bernardý-dý-Kampý qalashyǵyndaǵy úıden tabyldy. Oqıǵa ornynda 44 jastaǵy er adam kúdikti retinde ustaldy.
Ótken jyldyń 7 jeltoqsanynda Marıý dı Andradı kitaphanasynda bolǵan tonaý kezinde eki ury kúzetshi men kitaphanaǵa kelgen egde jastaǵy jupty basyp-janshyp, týyndylardy basty kireberis arqyly jaıaý alyp ketken.
Buǵan deıin iske baılanysty taǵy úsh adam ustalǵan bolatyn. Tonaý kezinde qolǵa túsken brazılıalyq sýretshi Kandıdý Portınarýdyń bes týyndysy áli tabylǵan joq.
Beısenbi kúni ustalǵan Jýan Paýlý Lımares de Araýjý polısıanyń boljamynsha, týyndylardy urlyqqa qatysy bar dep aıyptalǵandardyń tapsyrmasy boıynsha saqtaǵan. Bul týraly brazılıalyq Globo basylymy habarlady.
Brazılıa BAQ-ynyń málimetinshe, 53 jastaǵy Laesıo Rodrıges de Olıveıra — belgili óner urysy, ol qylmysty josparlap, basqarǵan dep kúdikteledi. Ol sáýir aıynan beri basqa is boıynsha qamaýda otyr.
Kitaphanadaǵy tonaýǵa baılanysty taǵy bir er adam men bir áıel ustalǵan.
Matıstiń Jazz atty shekteýli tırajben shyqqan kitapqa arnalǵan ılústrasıalary men Portınarýdyń brazılıalyq jazýshy Joze Lıns dý Regýnyń «Menino de Engenho» (Plantasıa balasy) romanynyń arnaıy basylymyna jasaǵan bes gravúrasy San-Paýlý zamanaýı óner murajaıymen birlesken kórmeniń bóligi bolǵan.
Urylar «Kitaptan murajaıǵa» dep atalatyn kórmeniń sońǵy kúnin nysanaǵa alǵan. Olar kitaphanaǵa tańǵy saǵat 11 shamasynda basty kireberisten kirip, tonaýdan keıin eń jaqyn metro beketine bet alǵan.
Jergilikti mádenıet departamenti ılústrasıalar kitaphanaǵa qaıtarylǵanyn, al kitaphananyń qaýipsizdigi kúsheıtilgenin habarlady.
Matıs 20 ǵasyrdyń eń yqpaldy sýretshileriniń biri sanalady, al óner synshylary urlanǵan týyndylardyń qunyn «baǵa jetpes» dep baǵalaıdy.
Kóbinese aýyl eńbekkerleri men jumysshylardy beıneleıtin Portınarý — brazılıalyq modernızmniń eń mańyzdy ókilderiniń biri.