Brazılıanyń ońtústiginde jolaýshylar avtobýsy men júk kóliginiń betpe-bet soqtyǵysýy saldarynan keminde 21 adam qaza taýyp, taǵy tórteýi jaraqat aldy. Bul týraly jergilikti bılik ókilderi habarlady.
Oqıǵa jergilikti ýaqyt boıynsha tańǵy 04:30 shamasynda (Grınvıch boıynsha 07:30) Parana shtatynyń ońtústigindegi BR-373 tas jolynda bolǵan. Jergilikti BAQ derekterine súıensek, avtobýs jaqyn mańdaǵy Imbıtýva qalasynyń densaýlyq saqtaý organdaryna tıesili bolyp, Ponta-Grossa qalasyna (shamamen 60 shaqyrym jerde) emdelýge bara jatqan naýqastar men olardyń týystaryn tasymaldaǵan.
Eki kóliktiń soqtyǵysý sebebin anyqtaý úshin tergeý bastaldy. Tas joldyń 209-shaqyrymynda bolǵan oqıǵa ornyn sarapshylar men federaldy jol polısıasy qyzmetkerleri tekserip jatqandyqtan, tas jol ýaqytsha jabyldy.
Brazılıada jol-kólik oqıǵalarynan bolatyn ólim sırek emes. Dúnıejúzilik banktiń zertteýine sáıkes, 2023 jyly mundaı apattardan 34 myńnan astam adam qaza tapqan, olardyń kópshiligi motosıkl júrgizýshileri. Zertteýler kórsetkendeı, shamadan tys jyldamdyq, mas kúıinde júrgizý jáne kólik júrgizý kezinde uıaly telefondy paıdalaný jıi sebep bolady.
Aqpan aıynda eldiń soltústik-shyǵysyndaǵy Seara shtatynda festıválǵa bara jatqan qajylar mingen avtobýsta 15 adam qaza tapqan edi.