Parıjde aýksıonǵa qoıylǵan fransýz aktrısasy Brıjıt Bardonyń jeke zattary shamamen 1 mln eýro ákeldi, al lottardyń aldyn ala baǵasy 50 myń eýro shamasynda edi. Bul týraly infohub.kz saıty habarlaıdy.
Millon aýksıon úıi aktrısanyń Parıjdegi úıi men Sen-Tropedegi rezıdensıasynan 285 zatty saýdaǵa shyǵardy. Lottar arasynda kıim, aksesýarlar, ydys-aıaq, jıhaz jáne Bardonyń basqa da jeke zattary boldy. Saýdaǵa Fransıa men basqa elderden 3 myńǵa jýyq satyp alýshy tirkeldi.
«Brıjıt Bardo taǵy da kórnekti alhımık retinde tanyldy: ol shamamen 50 myń eýroǵa baǵalanǵan lottardy komısıalyq tólemderdi qosqanda 1 mln eýroǵa jýyq somaǵa aınaldyrdy», — dedi aýksıonıst Aleksandr Mıllon.
Bastapqy baǵasyna qatysty eń qymbat lottardyń biri aktrısanyń úı janýarlaryna tıesili eki ıt moıynturyǵy boldy. Juby 30 eýroǵa baǵalanǵan olar 9,4 myń eýroǵa satyldy. Moıynturyqtarǵa ilingen adrestik belgilerde Bardonyń esimi men telefon nómiri jazylǵan. Satyp alýshy Reseı azamaty boldy.
Aktrısanyń avtoportreti 40 myń eýroǵa jýyq baǵaǵa ketti, al ol avtobıografıasyn jazǵan jazý mashınkasy 4,6 myń eýroǵa satyldy. Bardonyń eki gıtarasy 8,6 myń jáne 1,9 myń eýroǵa, al ıtbalyqtyń balasyn beıneleıtin úsh jumsaq oıynshyq 2,2 myń eýroǵa jýyq baǵaǵa satyldy.
Aýksıondan túsken qarajat Bardonyń janýarlardy qorǵaý qoryna, sondaı-aq onyń jalǵyz uly Nıkolá-Jak Sharege jiberiledi.
Brıjıt Bardo 1934 jyly Parıjde dúnıege kelgen. Ol 1952 jyly kınoda debút jasap, akterlik mansabynda 50-den astam fılmge túsken. Onyń qatysýymen túsirilgen eń tanymal týyndylardyń qatarynda «Qudaı áıeldi jaratty», «Shyndyq», «Jeke ómir» jáne «Vıva, Marıa!» bar. «Shyndyq» fılmi sheteldik fılmder sanatynda «Oskar» syılyǵyna usynylǵan.
1973 jyly Bardo akterlik mansabyn aıaqtady. Osydan keıin ol janýarlardy qorǵaýǵa den qoıyp, janýarlarǵa kómektesetin jáne olardy qorǵaýǵa shaqyratyn óz qaıyrymdylyq qoryn qurdy.
Bardo 2025 jyldyń 28 jeltoqsanynda 91 jasynda qaıtys boldy. Aktrısanyń jubaıy Bernar d'Ormal habarlaǵandaı, Bardonyń ólimine onkologıalyq aýrý sebep bolǵan. Aktrısany Fransıanyń Sen-Trope qalasynda jer qoınyna tapsyrdy.
Buǵan deıin biz Dıana hanshaıymnyń «kek qaıtaratyn kóılegi» 30 jyldan keıin alǵash ret aýksıonǵa qoıylatynyn habarlaǵan bolatynbyz.