Aptap ystyqta sýyq salat pen salqyn roze sharap ornyna brıtandyqtar qunarly kotej pırogy men qoıý qyzyl sharapty qalaıtyn boldy. «Keri jubatý tamaqtanýy» dep atalatyn bul úrdiste Waitrose dúkeniniń kotej pırogy satylymy ótken aımen salystyrǵanda 110%-ǵa, al Ońtústik Afrıkanyń qyzyl sharaby ótken jyldyń dál osy kezeńimen salystyrǵanda 68%-ǵa ósti dep habarlaıdy infohub.kz saıty.
Qysqy jubatý taǵamdaryna suranystyń bul tosyn ósýi retro stılindegi taýyq, bekon jáne poreı pırogyna (41%-ǵa), taýyq kormasyna (67%-ǵa) jáne taýyq eti men vechına gratenine (68%-ǵa) da qatysty. Sonymen qatar, ystyqqa qaramastan, úı aspazdary pesh janynda turýǵa daıyn: jelidegi reseptter saıtynda toad-ın-ze-hol (shujyq qosylǵan qamyr) izdeýler 67%-ǵa, spagettı boloneze 91%-ǵa, rarebıt mak end chız 57%-ǵa ósken.
1950 jyldardaǵy taǵy bir dástúrli taǵam – trıfl de suranysqa ıe: sýpermarkettegi qulpynaı qosylǵan trıfl satylymy jyldyq kórsetkishpen salystyrǵanda 100%-ǵa artty.
Tarıhshy ári jazýshy Seren Charrıngton-Hollıs jaqynda Llangollen Eısteddfod mýzyka festıvalindegi VIP is-sharaǵa as daıyndaǵan. Onyń kotej pırogtary men qoı etinen jasalǵan ystyq taǵamdar úlken suranysqa ıe bolǵan. «Bul maǵan tosynsyı boldy, óıtkeni aýa ystyq edi, biraq bári osy úı taǵamdaryn qalady», – deıdi ol. Qonaqtar salattan jalyqqan eken.
Charrıngton-Hollıstiń aıtýynsha, ómir súrý quny daǵdarysy, jahandyq soǵystar men qaqtyǵystar, eldegi saıası ózgerister belgisizdik týdyrsa, ádetten tys ystyq aýa raıy qolaısyzdyqty kúsheıtken. Onyń pikirinshe, bul «psıhologıalyq aýysý»: adamdar úıde pisirilgen dástúrli taǵamdarǵa úńilýde. «Biz tolyq sınhronnan shyǵyp qaldyq. Mundaı jyly aýa raıyna úırenbegenbiz. Tamaq arqyly ózimizben baılanysyp, tamyrymyzǵa oralýdan artyq ne bar?» – deıdi ol.
Aspaz Saımon Výd ómir súrý quny daǵdarysyn faktor retinde ataıdy. Mundaı taǵamdar burynnan pabtardyń klasıkasy bolǵan. Biraq qazir adamdar únemdeý úshin úıde daıyndaýǵa tyrysady. Ol sondaı-aq ýaqyttyń azdyǵy men aspazdyq daǵdylardyń jetispeýshiligin atap ótedi. Sonymen qatar, «adamdar salattan jalyqty, al aptasyna bir ret dúkenge baratyndar úshin salat uzaq saqtalmaıdy».
Ýorvık ýnıversıtetiniń tarıhshysy profesor Rebekka Erl jubatý úshin tamaqtanýdy adamdardyń uzaq ýaqyt boıy qoldanǵan ádisi dep sanaıdy. Taýyq kormasy sıaqty taǵamdardyń tanymaldyǵy «bári 1950 jyldardaǵy dástúrli úı sharýasyndaǵy áıelder týraly emes ekenin kórsetedi, bul kópmádenıetti Brıtanıanyń kórinisi».
Waitrose kompanıasynyń aǵa ınovasıalyq aspazy Stıven Parkıns-Naıttyń pikirinshe, adamdar nostalgıalyq dástúrli taǵamdardy qalaıdy. «Termostatty umytyńyz – aptap ystyq uzaqqa sozylǵanda, shıki salattar men salqyn tabaqtar tez tartymdylyǵyn joǵaltady. Biz «keri jubatý tamaqtanýy» úrdisin kórip otyrmyz: kúni boıy ystyqtan sharshaǵan adamdar qýat alý úshin qunarly, negizgi taǵamdardy qalaıdy», – deıdi ol.