Qazaqstannyń Damý banki 2026 jyly Qyzylorda oblysynda jalpy qýaty 70 MVt kún elektr stansıalary parkiniń qurylysyn qarjylandyrýǵa kiristi. Jobany VIGOR Holding kompanıasy júzege asyryp otyr. Onyń eń iri aksıoneri — qazaqstandyq mıllıarder Vladımır Kımniń qurylymdaryna qatysy bar top-menedjer Dınara Ýldanova, dep habarlaıdy infohub.kz saıty.
BRK dereginshe, joba maquldanǵan, qarjylandyrý 2026 jyly bastalǵan. Jobanyń quny 148,9 mln qytaı ıýanine — shamamen 9,46 mlrd teńgege baǵalanyp otyr. Osy somanyń 104,1 mln ıýanin (shamamen 6,61 mlrd teńge) nemese málimdelgen qunnyń 70%-yn Qazaqstannyń Damý banki berdi.
Qarajat 15 jylǵa deıingi merzimge bólinedi. Syıaqy mólsherlemesi qalqymaly — 5Y LPR (Qytaıdyń bazalyq mólsherlemesi) plús 4,16 paıyzdyq tarmaqty quraıtyn turaqty ústeme.
Ýldanovanyń esimi «Qazaqmys» qurylymyndaǵy kompanıalardyń korporatıvtik qujattarynda kezdesedi. Atap aıtqanda, ol Kazakhmys Copper men Bank RBK-niń 2025 jylǵy affılıırlengen tulǵalar tiziminde bar.
Aıta keteıik, 65 jastaǵy mıllıarder Vladımır Kımge Kazakhmys Holding Limited-tiń 70%-y tıesili, qalǵan 30%-yn Edýard Ogaı baqylaıdy.
Sonymen qatar Adata dereginshe, Ýldanova osy toptyń energetıkalyq bıznesine KCC Power Provider basshysy retinde qatysy bar. VIGOR Holding-tiń ózinde oǵan eń úlken úles — 50% tıesili. Taǵy 25%-dan Aıtýǵan Jaqsymbaı men Móldir Jaqanovaǵa tıesili.
Jaqsymbaı buryn «Qazyna Kapıtal Menedjmentte» basshylyq qyzmet atqarǵan. Affılıırlengen tulǵalar týraly qujattarda ol kompanıa basqarma tóraǵasynyń orynbasary jáne basqarma múshesi retinde kórsetilgen. Ol sondaı-aq Baiterek Venture Fund basqarma tóraǵasynyń orynbasary retinde de kórsetilgen.
Jaqanova da «Báıterek» tobynyń ınvestısıalyq qurylymynda jumys istegen. Affılıırlengen tulǵalar týraly qujattarda ol Qazaqstan Investment Corporation basqarma tóraǵasynyń orynbasary retinde kórsetilgen.
Osylaısha, VIGOR Holding-tiń úsh túpkilikti benefısıarynyń ekeýi «Báıterek» tobynyń ınvestısıalyq qurylymdarynda basshylyq qyzmette bolǵan.
VIGOR Holding kún energetıkasymen aınalysady. 70 MVt jobadan bólek, kompanıa Qyzylorda oblysyndaǵy Shıeli kentinde qýaty 20 MVt kún elektr stansıasyn iske asyrǵanyn habarlaǵan.
Vladımır Kım — Qazaqstannyń eń baı kásipkerleriniń biri, onyń baılyǵy eń aldymen taý-ken ónerkásibi men qarjy salasyna baılanysty.
Forbes Kazakhstan-nyń jańa «Qazaqstannyń 75 eń baı bıznesmeni – 2026» reıtıńi boıynsha onyń baılyǵy 5,9 mlrd dollarǵa baǵalanyp otyr. Bir jylda ol 200 mln dollarǵa ósken: 2025 jyly baǵa 5,7 mlrd dollar bolǵan. Osynyń arqasynda Kım Qazaqstannyń eń baı bıznesmenderi arasynda úshinshi orynnan ekinshi orynǵa kóterildi. Birinshi oryndy 7,8 mlrd dollarmen Vácheslav Kım ıelenip otyr.
Forbes-tiń 2026 jylǵy álemdik mıllıarderler tiziminde Vladımır Kım sol 5,9 mlrd dollarmen 712-orynda tur. Aıta keteıik, kórsetkish naqty ýaqyt rejıminde ózgerip otyrady: 9 qyrkúıekte Forbes onyń kapıtalyn taǵy da 5,9 mlrd dollar dep baǵalaǵan, biraq álemde 705-orynǵa qoıǵan.