Búırek obyryna qarsy jeke vaksına klınıkalyq synaqtyń birinshi kezeńinen sátti ótti: qatysqan toǵyz naýqastyń barlyǵynda ımýndyq jaýap qalyptasyp, aýrýdyń qaıtalanýy tirkelgen joq, dep habarlaıdy infohub.kz saıty.
Halyqaralyq zertteýshiler toby ashyq jasýshaly búırek jasýshasy obyrymen aýyratyn naýqastarǵa arnalǵan jeke vaksına ázirledi. Birinshi kezeń synaǵynyń qorytyndysy bedeldi Nature ǵylymı jýrnalynda jarıalandy.
Zertteýge buǵan deıin isikti alyp tastaý operasıasyn jasaǵan, aýrýdyń úshinshi jáne tórtinshi satysyndaǵy toǵyz adam qatysty. Ár naýqas úshin mamandar alynǵan isik tininen bólingen aqýyz fragmentteri — neoantıgender negizinde biregeı preparat jasady. Bes qatysýshy qosymsha ıpılımýmab ımmýnoterapıalyq preparatyn qabyldady.
Ortasha úsh jyl tórt aıǵa sozylǵan baqylaý kezeńinde qatysýshylardyń eshqaısysynda aýrý qaıtalanǵan joq. Toǵyz naýqastyń barlyǵynda turaqty ımýndyq jaýap qalyptasyp, jeteýinde T-jasýshalar óz isiginiń jasýshalaryn sátti tanydy.
Preparat qaýipsizdiktiń joǵary deńgeıin kórsetti: eń jıi kezdesetin janama áserler — ıneksıa ornyndaǵy reaksıalar jáne qysqa merzimdi tumaý belgileri. Aýyr jaǵymsyz qubylystar tirkelgen joq.
Jumys avtory Iel ýnıversıtetinen Devıd Braýn men Dana-Farber obyr ınstıtýtynan Tonı Shýerı odan ári zertteý qajettigin atap ótti. Olardyń aıtýynsha, iriktemeniń shaǵyndyǵy jáne baqylaý tobynyń joqtyǵy qaıtalanýdyń bolmaýy tek vaksınasıaǵa baılanysty dep senimdi túrde aıtýǵa ázirge múmkindik bermeıdi.