Birikken Ulttar Uıymynyń Azyq-túlik jáne aýyl sharýashylyǵy uıymynda (FAO) aýyldyq transformasıa jáne genderlik teńdik jónindegi dırektor qyzmetin atqarǵan Ben Devıs Gazadaǵy Izraıl saıasatyn synaǵany úshin jumysynan aıyrylǵanyn málimdedi, dep habarlaıdy infohub.kz saıty.
Ol sársenbi kúni Frans-Press aqparat agenttigine suhbat berip, shilde aıynda kelisimsharty uzartylmaıtynyn estigenin aıtty. Resmı túsindirme boıynsha, ol beıtaraptyq erejelerin buzǵan.
Devıstiń sózinshe, Rımde ornalasqan uıymda oǵan apta saıyn Gazadaǵy ashtyq pen asharshylyq jaǵdaıyna qatysty únsizdik aksıalaryn uıymdastyrdy degen aıyp taǵylǵan.
«Olar meni Gazadaǵy ashtyq pen asharshylyqqa baılanysty osy únsizdik sátterin uıymdastyrdy dep aıyptady», — dedi ol.
Sonymen qatar Devıs mamyr aıynda jarıalanǵan, Gazadaǵy azyq-túlik qoljetimdiligi men gýmanıtarlyq quqyq týraly esep úshin de synǵa ushyrady.
«Bizge ony alyp tastaýdy tapsyrdy. Gýmanıtarlyq quqyqqa qatysty eshqandaı silteme jasaýǵa ruqsat berilmedi», — dep atap ótti ol.
FAO Bas dırektory Súı Dýnúı seısenbi kúni uıym qyzmetkerlerine «biz munda adam quqyqtary oıynyn oınaýǵa jol bermeımiz» dep eskertken kórinedi. Ol orman sharýashylyǵyna arnalǵan otyrystyń basynda osylaı dep málimdegen.
«Árıne, adam quqyqtary óte mańyzdy, biraq Jenevada adam quqyqtary jónindegi agenttik bar. Eger aınalysqyńyz kelse, sonda baryńyz», — dep qosty ol.
«Sondyqtan keıbir joǵary laýazymdy qyzmetkerler munda saıası oıyn oınaıdy, men ony jumystan shyǵaramyn... Siz FAO jarǵysyn ustanýyńyz kerek... Siz qyzmetkerler týraly erejelerge qarsysyz... Biraq men óte jumsaq adammyn, onsha kóp adamdy jumystan shyǵarǵan joqpyn», — dedi ol.
«Zańǵa qarsy kelgen adamdardy kóbirek jumystan shyǵaramyn», — dep qosty Bas dırektor.
FAO Frans-Press agenttiginiń pikir suraǵan ótinishine jaýap bermedi.
Bas dırektordyń aıtqandary ózine qatysty ma degen suraqqa Devıs «ábden» dep jaýap berdi. «Ol buryn da meni tym saıası dep kópshilik aldynda sókken», — dedi ol.
Devıs sondaı-aq Bas dırektordyń taǵy da adamdardy jumystan shyǵarý týraly sózderine alańdaıtynyn jetkizdi.
Onyń aıtýynsha, únsizdik aksıalary eń kóp taraǵan kezde oǵan júzdegen adam qatysqan, al qazir apta saıyn bar bolǵany 30–40 adam keledi.
Izraıldiń Gazaǵa qarsy júrgizgen soǵysy 2023 jyldyń qazan aıynan beri 74 myńnan astam adamnyń ómirin qıdy. Al HAMAS pen Izraıl arasynda 2025 jyldyń qazan aıynda kelisilgen atysty toqtatýdan keıin keminde 1 431 palestınalyq ızraıldik shabýyldardan qaza tapty.