Aqmola oblysynda Býrabaı kýrorttyq aımaǵynda ornalasqan Kókshetaý men Bólektaý taýlaryna shyǵýǵa ýaqytsha tyıym salyndy. Shekteý 10-20 tamyz aralyǵynda kúshinde bolady, dep habarlaıdy infohub.kz saıty.
«Býrabaı» memlekettik ulttyq tabıǵı parkiniń baspasóz qyzmetinde túsindirgendeı, bul sheshim memlekettik orman qory aýmaǵynda órt qaýpiniń joǵary synyby belgilenýine baılanysty qabyldandy. Bul kezeńde qurǵaq orman tósenishi men ósimdikter órtke ásirese osal bolady, al qolaısyz aýa raıy jaǵdaıynda ottyń taralýy óte jyldam júrýi múmkin.
«Sheshim kelýshilerdiń qaýipsizdigin qamtamasyz etý jáne orman órtteriniń aldyn alý maqsatynda qabyldandy», — dep atap ótti ulttyq parkte.
Shekteý kezeńinde Borov ormanshylyǵynyń memlekettik ınspektorlaryna Kókshetaý men Bólektaýǵa shyǵýǵa tyıym salýdyń saqtalýyn baqylaýdy kúsheıtý tapsyryldy. Kýrorttyq aımaqtyń turǵyndary men qonaqtary ýaqytsha sharany túsinistikpen qabyldap, jabyq marshrýttarǵa ótpeýge jáne órt qaýipsizdigi talaptaryn qatań saqtaýǵa shaqyrylady.