Aqmola oblysynyń Býrabaı eldi mekeninde Network City halyqaralyq tehnologıalyq qalashyǵyn salý josparlanýda. Bul qalashyq álemniń túkpir-túkpirinen IT mamandaryn, kásipkerler men zertteýshilerdi tartatyn ortalyqqa aınalmaq.
Joba Qazaqstan premer-mınıstri Oljas Bektenovtiń Network School halyqaralyq qoǵamdastyǵynyń negizin qalaýshy, shyǵý tegi úndistandyq amerıkandyq kásipker Baladjı Shrınıvasanmen kezdesýinde talqylandy. Baladjı Shrınıvasan Kremnı alqabynyń bıotehnologıa, krıptovalúta, jasandy ıntellekt jáne tehnologıalyq kásipkerlik salalarynda jumys isteıtin yqpaldy ókilderiniń biri retinde tanymal.
Ázirleýshiler men startaptarǵa arnalǵan bul qala Býrabaıdyń tabıǵı landshaftyna úılestirilgen modýldik ınfraqurylymdy salýdy kózdeıdi. Keıinnen bastamany Alatau City-ge de taratý josparlanýda. Network City-de bilim berý baǵdarlamalaryn, kovorkıngterdi, konferensıalardy, hakatondardy jáne startap akseleratorlaryn biriktirý kózdelgen. Joba avtorlarynyń oıynsha, munda ártúrli elderdiń ázirleýshileri, ınjenerleri, kásipkerleri men zertteýshileri jumys istep, oqyp, tájirıbe almasa alady.
Sonymen qatar, taraptar Qazaqstanda AI Film Festival ótkizý máselesin talqylady. Bul festıváldiń júlde qoryn Baladjı Shrınıvasan qamtamasyz etedi. Sondaı-aq AI & Digital Bridge forýmy aıasynda álemdik tehnologıalyq kompanıalardyń qatysýymen Network State Conference ótkizý josparlanýda.
Baladjı Shrınıvasan Qazaqstannyń jasandy ıntellekt salasyndaǵy áleýetin joǵary baǵalap, eldiń jahandyq tehnologıalyq ekojúıeniń bóligi bola alatynyna senimdi ekenin aıtty. Ol sondaı-aq Network School jobalary tek jeke ınvestısıalar esebinen júzege asyrylatynyn jáne memlekettik qarjylandyrýdy qajet etpeıtinin atap ótti.
Oljas Bektenovtyń aıtýynsha, Qazaqstan halyqaralyq saraptamany tartýǵa jáne álemdik tehnologıalyq qaýymdastyqpen yntymaqtastyqty damytýǵa múddeli. «Adam kapıtalyn, bilim berýdi, ǵylym men ınovasıany damytý – memlekettik saıasattyń strategıalyq baǵyttarynyń biri. Jasandy ıntellekttiń el damýyndaǵy róline jáne azamattardyń jeke derekterin qorǵaýǵa erekshe kóńil bólinedi», – dedi premer-mınıstr. Ol Qazaqstanda Digital Qazaqstan strategıasy júzege asyrylyp jatqanyn, sondaı-aq Astana Hub, Ekibastuzdaǵy «Derekter ortalyqtary alqaby» jáne TUMO men Tomorrow School bilim berý baǵdarlamalary jumys isteıtin Alem.ai halyqaralyq jasandy ıntellekt ortalyǵy syndy iri sıfrlyq jobalar damyp jatqanyn eske saldy.
Kezdesý qorytyndysy boıynsha premer-mınıstr profıldi memlekettik organdarǵa jobany júzege asyrýǵa járdemdesýdi tapsyrdy.
Buǵan deıin «Kýrsıv» Qazaqstannyń ózindik «Derekter ortalyqtary alqabyn» – Ekibastuzda derekterdi óńdeý ortalyqtaryna arnalǵan úlken tehnopark quryp jatqanyn jazǵan bolatyn. Bılik Microsoft, Google jáne Amazon kompanıalarymen olardyń osynda óz serverlik qýattaryn salýy úshin kelissóz júrgizýde.