Qytaılyq BYD avtóndirisi Fang Cheng Bao Ti 3 elektr krosoveriniń jańa bazalyq nusqasyn usyndy, ol Qazaqstanda Leopard 3 degen atpen belgili. Avtokólik ekinshi býyndaǵy Blade akýmýlátorymen, 510 km-ge deıingi júris qorymen jáne óte jyldam zarádtaýdy qoldaýmen jabdyqtalǵan, dep habarlaıdy infohub.kz saıty.
Jańa nusqa Ti 3 jelisindegi eń qoljetimdi boldy. Baǵasy 21,3 myń AQSh dollarynan (shamamen 9,9 mıllıon teńge) bastalady. Buǵan deıin Qytaıdaǵy model baǵasy 153,8 myń ıýánnan (shamamen 10,6 mıllıon teńge) bastalǵan edi.
Jańalyqtyń basty ereksheligi — jyldam zarádtaýdy qoldaý. BYD-diń 1 MVt qýattylyqtaǵy stansıalarynda batareıany 10%-dan 97%-ǵa deıin nebári 9 mınýtta toltyrýǵa bolady.
Qozǵalysqa artqy ostegi qýaty 240 kVt (322 at kúshi) jáne aınalý momenti 305 Nm bolatyn elektr qozǵaltqyshy jaýap beredi. 100 km/saǵ deıin údeý 6,9 sekýndty alady, maksımaldy jyldamdyǵy — 210 km/saǵ. Avtokóliktiń jabdyqtalǵan massasy 1920 kg quraıdy.
Ti 3 ólshemderi — 4605×1900×1720 mm, dońǵalaq bazasy — 2745 mm. Aldyńǵy júk salǵyshta 151 lıtr oryn qarastyrylǵan, taǵy bir 28 lıtrlik bólik artqy esikte ornalasqan.
Qosymsha aqyǵa krosoverdi lıdarmen jabdyqtalǵan DiPilot 300 («Qudaıdyń kózi») júrgizýshige kómek júıesimen jaraqtandyrýǵa bolady, ol qala kóshelerinde jáne tas joldarda avtokólikti basqara alady.
Salonda 15,6 dúımdik ortalyq ekran, 8,8 dúımdik sıfrlyq panel jáne 12 dúımdik proeksıalyq dıspleı ornatylǵan. Aldyńǵy oryndyqtar jylytý, jeldetý jáne bıiktik retteýishimen jabdyqtalǵan.
Leopard 3-tiń qymbatyraq nusqalary 75,6 kVt·s batareıamen jabdyqtalǵan. Onymen aldyńǵy jetekti nusqa CLTC sıkli boıynsha 620 km-ge deıin júre alady, al flagmandyq nusqa tolyq jetek pen jalpy qýaty 375 kVt (503 at kúshi) bolatyn eki elektr qozǵaltqyshyn alady.
Buǵan deıin BYD 2 tonnaǵa deıin súıreı alatyn úlken Ti 9 gıbrıdin kórsetkeni habarlanǵan bolatyn.