2026 jylǵy 11 qyrkúıekte Almatyda Central Asia Fintech Summit (CAFS) ótedi. Ony Qazaqstan Respýblıkasynyń Ulttyq banki, Ulttyq tólem korporasıasy jáne Kazakhstan Fintech Network uıymdastyrady. İs-shara aldaǵy onjyldyqtyń qarjy naryǵynyń arhıtektýrasyn talqylaý úshin top-menedjerlerdi, qarjy sektorynyń basshylaryn jáne salanyń jetekshi sarapshylaryn jınaıdy, dep habarlaıdy infohub.kz saıty.
Almatydaǵy «Selınnyı» zamanaýı mádenıet ortalyǵynda ótetin aýqymdy sharanyń basty taqyryby — «Senim dáýiri: kelesi onjyldyqtyń qarjy naryǵy qandaı bolady?».
Aldaǵy samıttiń baǵdarlamasy sıfrlyq ekonomıkanyń negizgi syn-qaterleri men makrotrendterine baǵyttalǵan. İri qarjy ınstıtýttarynyń basshylary, fınteh kompanıalary jáne memlekettik sektor ókilderi salanyń strategıalyq damý vektorlaryn, jańa býyn tólem júıeleriniń bolashaǵyn jáne sıfrlyq qarjynyń transshekaralyq múmkindikterin talqylaıdy.
Uıymdastyrýshylar búginde naryq arhıtektýrasyn ózgertip jatqan tehnologıalyq ınovasıalarǵa erekshe mán beredi. Pikirtalas panelderinde sarapshylar jasandy ıntellektti naqty ekonomıkada qoldanýdy jáne qadaǵalaý tehnologıalarynyń evolúsıasyn qarastyrady.
Samıttiń mańyzdy bóligi — sıfrlyq qarjy aktıvteri úshin jahandyq básekelestik pen qazirgi qarjy tehnologıalaryna degen senimniń negizi bolyp tabylatyn alaıaqtyqtan qorǵaýdyń ujymdyq júıesin qurýdy talqylaý.
CAFS 2026 alańynda aımaqtyń fınteh ekojúıesin keńeıtý boıynsha jańa strategıalyq bastamalar usynylady, sıfrlyq ekonomıkany qorǵaý jáne ınklúzıvti tehnologıalyq qaýymdastyqtardy damytý salasyndaǵy úzdik jetistikter atap ótiledi.
Central Asia Fintech Summit (CAFS) — aımaqtaǵy qarjy jáne tehnologıa sektorlarynyń basty oqıǵalarynyń biri. İs-shara bank salasynyń top-menedjerlerin, memlekettik sektor men fınteh kompanıalarynyń ókilderin sıfrlyq ekonomıka men qarjy naryǵynyń bolashaǵyn talqylaý úshin biriktiredi.
Ulttyq tólem korporasıasy (UTK) — Qazaqstan Respýblıkasy Ulttyq bankiniń enshiles uıymy. UTK ulttyq tólem júıesiniń úzdiksiz jumysyn qamtamasyz etedi, bankaralyq júıeniń tehnıkalyq operatory retinde áreket etedi, sondaı-aq ozyq sıfrlyq ınfraqurylym jobalaryn («Biryńǵaı QR», Open Banking, «Sıfrlyq teńge») damytady.
Kazakhstan Fintech Network — memleketti, qarjy naryǵyn, tehnologıalyq kompanıalardy, startaptardy jáne halyqaralyq seriktesterdi Qazaqstannyń fınteh ekojúıesin damytý úshin biriktiretin beıtarap salalyq platforma. Uıym Qazaqstandaǵy Global Financial Technology Network (GFTN) kompanıasynyń eksklúzıvti seriktesi bolyp tabylady.
Uıymdastyrýshylar: Ulttyq tólem korporasıasy, Kazakhstan Fintech Network, Qazaqstan Respýblıkasynyń Ulttyq banki. Ótetin orny: Almaty q., Masanchı k-si, 59 («Selınnyı» zamanaýı mádenıet ortalyǵy). Tirkelý jáne baǵdarlamanyń egjeı-tegjeıi: centralasiafintech.kz.