Chad Halyqaralyq qylmystyq sottan (HQS) shyǵatynyn málimdep, bul sotty tıimsizdikte jáne afrıkalyq elderge qatysty ádiletsizdikte aıyptady. Batys Afrıka eli Birikken Ulttar Uıymyna (BUU) sottan shyǵý týraly hat joldady. HQS – adamzatqa qarsy eń aýyr qylmystardy jasaǵandardy sottaıtyn halyqaralyq organ, onyń negizgi qujaty – Rım statýty. Shyǵý rásimi keminde bir jylǵa sozylady. ...dep habarlaıdy infohub.kz saıty.
Chad 2025 jyldan beri HQS-tan shyǵatyn tórtinshi afrıkalyq el boldy. Buǵan deıin Nıger, Malı jáne Býrkına-Faso ótken jyly Gaagadaǵy sottan shyǵatynyn jarıalaǵan edi.
Sot aýyr syn-qaterlerge tap bolýda. 24 shildede bas prokýror Karım Han jynystyq sıpattaǵy teris qylyqtarǵa baılanysty qyzmetinen alyndy. AQSh Memlekettik hatshysy Marko Rýbıo osy aıdyń basynda AQSh HQS-tyń egemendikke qater tóndiretinin aıtyp, ony joıý naýqanyn bastaıtynyn málimdedi. 2025 jylǵy aqpanda AQSh prezıdenti Donald Tramp qol qoıǵan atqarýshy buıryq AQSH-tyń odaqtasy Izraıldi tergeýine baılanysty sotqa sanksıa saldy.
AQSH-tyń Afrıka isteri búrosy dúısenbi kúni H (burynǵy Twitter) áleýmettik jelisindegi jazbasynda 125 múshe memlekettiń arasynan basqalaryn da Rım statýtynan shyǵýǵa shaqyrdy. «Amerıka Qurama Shtattary Chadtyń HQS-tan shyǵý jáne osy jetilmegen ınstıtýttan óz egemendigin qaıtaryp alatyn elder sanyna qosylý týraly sheshimin quptaıdy», — delingen mekeme málimdemesinde.