«Atyraý» fýtbol klýby bas jattyqtyrýshy Vladımır Chebýrınmen yntymaqtastyqty toqtatqanyn resmı túrde habarlady. Qazaqstandyq maman óz ketýine qatysty beıneúndeý jazyp, pikir bildirdi, dep habarlaıdy infohub.kz.
Chebýrın bıylǵy jyldyń naýryz aıynda «Atyraý» komandasyn basqarǵan bolatyn. Onyń jetekshiligimen komanda Qazaqstan premer-lıgasynda 19 oıyn ótkizip, 19 upaı jınap, týrnır kestesinde 13-orynǵa turaqtady. Bapkerdiń aıtýynsha, taraptar ózara kelisim boıynsha ajyrasqan.
«„Atyraý“ basshylyǵyna alǵysymdy bildirgim keledi. Berilgen múmkindikter úshin rahmet! Men basqa adamdardyń komandasyna keldim, basshylyq aýysty. Qazirgi jaǵdaı osyndaı. Barlyq bapkerlik shtabqa, uzaq ýaqyt boıy menimen birge bolǵan oıynshylarǵa rahmet», — dedi Chebýrın.
Óz kezeginde klýb 61 jastaǵy mamanǵa «jumysy, kásibıligi jáne komandaǵa qosqan úlesi» úshin alǵys bildirdi. «Birge ótkizgen ýaqyt, jeńister men qıyn sátter klýb tarıhynyń bir bóligi bolyp qalady. Vladımır Nıkolaevıchke sáttilik, myqty densaýlyq jáne bolashaq mansabynda jańa jeńister tileımiz!» — delingen «Atyraý» málimdemesinde.
Jańa bas jattyqtyrýshynyń aty ázirge resmı túrde jarıalanǵan joq. Insaıderlerdiń aqparatyna súıensek, birneshe kún buryn Túrkistannyń «Turan» komandasynyń bapkerlik shtabynda asıstent qyzmetinen ketken Samat Smaqovtyń taǵaıyndalý yqtımaldyǵy joǵary.