2026 jyldyń tamyzynda Qazaqstanda jańa kólik satylymy ótken jyldyń osy aıymen salystyrǵanda 6,3%-ǵa ósti. Chevrolet Cobalt modelder arasynda birinshi oryndy saqtap qaldy, al Changan CS35 MAX úzdik úshtikke endi, dep habarlaıdy infohub.kz saıty.
Tamyzda resmı dılerler 19,1 myń jańa jeńil jáne komersıalyq kólik satty, byltyr bul kórsetkish 18 myń bolatyn. Markalar arasynda Hyundai kósh bastady — 3604 kólik (+1,3%). Ekinshi oryndy Chevrolet ıelendi, onyń nátıjesi 2764 mashına (+5,9%). Changan úshinshi satyǵa kóterilip, satylymyn eki eseden astam arttyryp, 2217 kólikke jetkizdi.
Kia tórtinshi orynǵa tústi. Bul markanyń dılerleri 1556 mashına satty, bul byltyrǵy nátıjeden 25,9%-ǵa az. Bestikti Chery túıindedi — 1129 kólik (+34,4%).
Sondaı-aq eń kóp satylǵan on markanyń qataryna mynalar endi: Toyota — 1121 kólik (+8%); Haval — 897 (+4,9%); Jetour — 865 (-6,8%); Geely — 815 (-9,4%); BYD — 620 (+41,6%).
MG satylymy odan da aıqyn ósti — 132,8%-ǵa. Alaıda absolúttik kórsetkishte markanyń nátıjesi shaǵyn kúıinde qalyp otyr: 142 mashına.
Modelder reıtıńinde úzdik úshtik shildeden beri ózgergen joq. Birinshi oryndy Chevrolet Cobalt ıelendi — 2603 kólik. Odan keıin Hyundai Tucson (1643) jáne Changan CS35 MAX (1186) tur.
Tórtinshi oryndy Hyundai Mufasa — 708 kólikpen aldy, al bestikti Hyundai Elantra 651 mashınamen túıindedi.
Eń kóp satylǵan on modeldiń qataryna sondaı-aq Kia Sportage (646), Haval Jolion (588), Toyota Camry (583), Changan CS55 Plus (453) jáne Kia Cerato (350) endi.
Jyl basynan beri naryq oń serpinin saqtap otyr. Qańtar–tamyz aralyǵynda Qazaqstanda 146,4 myń jańa kólik satyldy — bul 2025 jyldyń osy kezeńindegi nátıjeden 2,3%-ǵa kóp.
Hyundai eń iri marka bolyp qala beredi, biraq onyń satylymy aıtarlyqtaı tómendedi — 24 563 kólikke, ıaǵnı 2025 jyldyń qańtar–tamyzymen salystyrǵanda 21,8%-ǵa azaıdy.
Chevrolet 23 205 kólikpen (+16,2%) ekinshi orynda, Kia 16 380 kólikpen (+5,1%) úshinshi orynda tur.
Tórtinshi orynǵa Changan shyqty — 14 144 kólik, bul byltyrǵy nátıjeden eki eseden astam artyq (+102,1%). Bestikti Chery túıindedi — 10 815 kólik (+16,4%).
Sonymen qatar BYD satylymy aıtarlyqtaı ósti: segiz aıda dılerler 3208 kólik satty, bul byltyrǵy kórsetkishten 133,3%-ǵa kóp.
Qazaqstandyq avtomobıl odaǵynyń prezıdenti Anar Maqasheva avtoparkti odan ári jańartý kóbine qarjylandyrýdyń qoljetimdiligine baılanysty ekenin atap ótti.
Onyń aıtýynsha, avtokredıt mólsherlemeleriniń ósýi satyp alýshylarǵa qarjylyq júktemeni arttyryp, suranysty tejeýi múmkin. QAO-da tek dástúrli avtokredıtterdi ǵana emes, óndirýshiler men dılerlerdiń baǵdarlamalaryn, trade-in, lızıń jáne satyp alýshylarǵa eski kólikterin jańasyna aýystyrýǵa múmkindik beretin basqa da quraldardy damytý mańyzdy dep sanaıdy.
Buǵan deıin Kýrsıv Avto shildede Qazaqstanda Cobalt-tan basqa qandaı kólikter satylym hıtine aınalǵanyn jazǵan bolatyn.