Amerıkalyq Consumer Reports jýrnaly 2026 model jylǵy shaǵyn avtomobılderdi salystyryp, qorytyndy baǵasy Subaru Impreza-dan joǵary bolǵan bes modeldi anyqtady. Tizimge Hyundai Elantra Hybrid, Honda Civic Hybrid, Mazda3, sondaı-aq Toyota Prius-tiń eki nusqasy endi, dep habarlaıdy infohub.kz saıty.
Consumer Reports-tyń 2026 jylǵy reıtıńinde Hyundai Elantra Hybrid men Honda Civic Hybrid 78 upaıdan jınady, al Subaru Impreza 75 upaı aldy. Jol synaqtarynda «Elantra» 83 upaı jınady — «Sýbarýdan» segiz upaı artyq. Hyundai gıbrıdiniń otyn shyǵyny synaqtarda bir gallonǵa 48 mıl boldy, Impreza-da 29 mıl.
Sonymen qatar Subaru boljamdy senimdilik pen ıeleriniń qanaǵattanýy boıynsha joǵary baǵa aldy. Elantra Hybrid 1,6 lıtrlik benzın qozǵaltqyshymen jáne elektr motorymen jabdyqtalǵan. Jalpy qýaty — 139 a.k., jetegi — aldyńǵy. AQSH-ta Blue nusqasynyń baǵasy $26,9 myńnan (shamamen 11,8 mln teńge) bastalady.
Honda Civic Hybrid de 78 upaı jınady. Jol synaqtarynda model 83 upaı aldy, al otyn únemdiligi bir gallonǵa 44 mıl boldy. Bul Subaru-dan aıtarlyqtaı joǵary. Alaıda Impreza boljamdy senimdilik boıynsha Civic Hybrid-ten ozdy. Civic Sport Hybrid-tiń bazalyq nusqasy AQSH-ta $30,7 myńnan (shamamen 13,5 mln teńge) bastalady.
Mazda3 77 upaı jınap, úshinshi orynǵa turaqtady. Bul rette Subaru ıeleriniń qanaǵattanýy men boljamdy senimdilik boıynsha Mazda-dan sál ozdy. Mazda3 sedan jáne hechbek kýzovtarynda shyǵarylady. Oǵan 186 a.k. qýatty 2,5 lıtrlik atmosferalyq motor jáne 250 a.k. týrbo nusqasy qoljetimdi. Baǵasy $25,9 myńnan (shamamen 11,4 mln teńge) bastalady.
Tizimge sondaı-aq Toyota Prius jáne Prius Plug-in Hybrid endi. Eki model de 76 upaıdan jınady — Subaru Impreza-dan bir upaı artyq. Bul rette qarapaıym «Prıýs» otyn únemdiliginde joǵary kórsetkish kórsetti, al eki «Toıota» da boljamdy senimdilik boıynsha «Sýbarýǵa» jol berdi. AQSH-ta qarapaıym Prius baǵasy $28,5 myńnan (shamamen 12,5 mln teńge), qosylatyn gıbrıd $35 myńnan (shamamen 15,4 mln teńge) bastalady.
Consumer Reports qorytyndy baǵada jol synaqtarynyń nátıjelerin, boljamdy senimdilikti, ıeleriniń qanaǵattanýyn, qaýipsizdik júıeleriniń bolýyn jáne krash-test nátıjelerin eskeredi.
Buǵan deıin Kýrsıv Avto 2026 jyldyń eń únemdi bes gıbrıdi týraly jazǵan bolatyn.