Daǵystanda toıda bastalǵan janjal kisi óltirýmen aıaqtaldy. 24 jastaǵy jigit birneshe pyshaq jaraqatyn alyp, aýrýhanada qaıtys boldy, dep habarlaıdy infohub.kz.
Bul qaıǵyly oqıǵa Sýleıman-Stal aýdanynyń Ashaga-Stal-Kazmalár aýylynyń shetinde boldy. Polısıa málimetinshe, 24 jastaǵy jigit pen 27 jastaǵy aýyl turǵyny buryn bir aýyldasynyń toıynda janjaldasyp qalǵan.
Keıin eki er adam kelispeýshilikti sheshý úshin kezdesken. Alaıda áńgime qaıtadan janjalǵa ulasyp, 27 jastaǵy kúdikti qarsylasyna bes ret pyshaq salǵan.
Aýyr jaralanǵan jigitti aýrýhanaǵa jetkizgen, biraq dárigerler onyń ómirin saqtap qala almady. Polısıa kúdiktini ustady. Tergeý materıaldary Daǵystan boıynsha Tergeý komıtetine berildi.
Bul fakti boıynsha Reseı Qylmystyq kodeksiniń 105-baby 1-bóligi – «Kisi óltirý» boıynsha qylmystyq is qozǵaldy. Qazirgi ýaqytta tergeýshiler janjaldyń naqty sebebi men oqıǵanyń barlyq mán-jaıyn anyqtap jatyr.
Oqıǵadan keıin áleýmettik jelilerde qaza tapqan adam sol kúni úılengen quıeý jigit bolǵandyǵy jáne shabýyl úılený túni bolǵandyǵy týraly aqparat tarady. Keıbir habarlarda janjaldyń sebebi aqsha bolýy múmkin ekendigi aıtyldy.
Alaıda resmı organdar bul derekterdi rastaǵan joq. Tergeý jalǵasýda.