AQSh Senatynyń múshesi Temmı Dakvort Pentagon men Federaldyq avıasıa ákimshiligine (FAA) hat joldap, Tramp ákimshiliginiń Vırdjınıa shtatynda salýdy josparlap otyrǵan «Saltanat qaqpasy» jobasyn synady. Ol bul jobany «aqylǵa syımaıtyn» dep atap, áýe keńistiginiń qaýipsizdigin arttyrýǵa kúsh salýǵa shaqyrdy, dep habarlaıdy infohub.kz saıty.
Dakvorttyń hatynda: «Amerıka halqy Tramptyń qaýipti josparyna, ásirese qaqpaǵa mergender ornalastyryp, drondar ushyrýdy josparlasa, áýejaıǵa keletin qarbalas traektorıa boıynda 250 fýt (72 m) bıiktiktegi qurylystyń kýási bolýǵa tóze almaıdy», – delingen. Hatty Bı-bı-sıdiń amerıkalyq seriktesi Sı-bı-es nús alǵan.
Alaıda FAA ótken aptada bul aýqymdy qurylys áýejaıǵa keletin jáne ketetin reısterge qaýip tóndirmeıdi dep sheshim shyǵardy. Beısenbide Tramp taǵaıyndaǵan adamdar basqaratyn Tarıhı murany saqtaý jónindegi keńes jergilikti sheneýniktermen atalǵan qurylystyń aımaqtaǵy 42 tarıhı nysanǵa áseri týraly mindetti keńesýlerdi toqtatatynyn jarıalady.
Keńes habarlamasynda federaldyq eskertkishterdi basqaratyn Ulttyq park qyzmeti osy nysandarǵa yqtımal zıandy azaıtý josparyn usynǵany, biraq jergilikti tarıhı murany saqtaý jónindegi qyzmetkerler «Saltanat qaqpasynyń maqsaty men qajettiligine qatysty alańdaýshylyq bildirgeni» aıtylǵan. Olar sondaı-aq qyzmettiń yqtımal zıandy jetkilikti anyqtaǵanyna jáne olardy joıý úshin jetkilikti sharalar josparlaǵanyna kúmán keltirdi.
Federaldyq jáne shtattyq sheneýnikter jobanyń zıandy azaıtý josparlary týraly kelisimge kelýge mindetti emes, al eki tarap kelise almasa, bul keńesýlerdi toqtatýǵa ruqsat etiledi. Keńes osy prosestiń qorytyndy esebin kelesi aıdyń basynda usynýdy josparlap otyr.
Sonymen qatar, Vırdjınıa shtatynan saılanǵan Demokratıalyq partıanyń kongresmeni Don Beıer qaqpa turǵyzylatyn alańda qazba jumystary bastalyp ketkenin aıtady.
Qaqpaǵa qarsy kongres opozısıasyn basqaryp otyrǵan Beıer beısenbide alańǵa barǵanda aýyr tehnıkamen jumys istep jatqan jumysshylardy kórgenin, olar oǵan «topyraq quramyn baǵalaý úshin arheologıalyq jumystar júrgizip jatqanyn» aıtqanyn jetkizdi. Bul «qatty alańdatady», deıdi Beıer, ásirese ákimshilik jumys bastalǵanǵa deıin 48 saǵat buryn habarlaýǵa mindetti bolǵandyqtan. «Ákimshilik osy jobanyń saldaryn túsiný úshin qajetti qarapaıym jumysty áli atqarmaı turyp, alańdaǵy qyzmetti jalǵastyryp jatqan sıaqty», – dep jazdy Beıer.
Osy jyldyń basyndaǵy dızaın jobasynda qaqpanyń tóbesinde altyn qanatty Azattyq hanymy, onyń eki jaǵynda eki altyn qyran beınelengen, al qurylystyń eki jaǵyna altyn áriptermen «One Nation Under God» jáne «Liberty and Justice for All» degen sózder jazylǵan.