Danıa Syrtqy ister mınıstrligi AQSh pen Grenlandıa arasyndaǵy aral qaýipsizdigi týraly kelisimniń mátinin jarıalady — sharttyń egjeı-tegjeıi belgili boldy, dep habarlaıdy infohub.kz saıty.
Qujat 22 qyrkúıekte qol qoıylǵan. Onda taraptar Arktıkadaǵy NATO belsendiligin kúsheıtýdi, sonyń ishinde josparlaý, áskerı qatysý, jattyǵýlar ótkizý jáne barlaý derekterin birlesip jınaýdy qoldaıtyny aıtylǵan.
Kelisimge sáıkes, AQSH-qa Grenlandıadaǵy Pıtýffık aeroǵaryshtyq áskerı bazasyn jańǵyrtyp, qyzmetin keńeıtýge, sondaı-aq Narsarssýak eldi mekeninde jáne Mestersvıg áskerı beketinde qosymsha qorǵanys aýmaǵyn qurýǵa ruqsat berilgen.
Sonymen qatar, AQSh Grenlandıada qosymsha qorǵanys aýmaqtaryn quryp, áskerı operasıalaryn kúsheıte alady nemese áskerı nysandaryn nyǵaıta alady.
Amerıkalyq ushaqtar Grenlandıanyń búkil aýmaǵynyń ústinen ushyp, onyń ishinde aýmaqtyq sýlarda qonýǵa quqyly, al AQSH-tyń memlekettik kemeleri Grenlandıanyń aýmaqtyq sýlaryna sý astynan kirip, onda eshqandaı shekteýsiz júze alady.
Grenlandıa týraly kelisim merzimsiz bolyp tabylady jáne ol 1951 jylǵy Qorǵanys kelisiminiń XIII babyna sáıkes taraptardyń ózara kelisimimen ǵana ózgertile alady.
Budan bólek, bolashaqta Grenlandıa táýelsizdik alsa, qujat Danıa men Grenlandıa úkimetterin araldyń NATO-ǵa músheligin saqtaýǵa nemese alýǵa kelisetinine jáne Danıa osy kelisimge qol qoıǵan kezde ózine alǵan barlyq mindettemelerdi oryndaıtynyna kepildik berýge mindetteıdi.
Eske salaıyq, Danıa, Grenlandıa jáne AQSh BUU Bas Assambleıasynda aral qaýipsizdigi týraly kelisimge qol qoıǵan bolatyn. Al Donald Tramp sol ýaqytta amerıkandyq áskerı bazalardyń aýmaǵynda qurylys salýdy jarıalady.