Danıa koroli men korolevasynyń úlken qyzy, 19 jastaǵy hanshaıym Izabella áskerı qyzmetke kiristi. Ol Slagelse qalasynyń mańyndaǵy kazarmalarǵa kelip, gvardıalyq gýsar polkiniń quramynda 11 aı qyzmet etetin bolady, dep habarlaıdy infohub.kz saıty.
Bıyl onymen birge dat armıasynyń qataryna taǵy 1600 jas jigit pen qyz qosyldy.
Dat BAQ-tary kоról saraıyna silteme jasap, hanshaıym Izabella qyzmet kezinde jalaqy almaıtynyn habarlady.
Eýropadaǵy qaýipsizdik jaǵdaıynyń shıelenisýine baılanysty Danıada mindetti áskerı qyzmet merzimi tórt aıdan 11 aıǵa uzartyldy. Elde 18 jasqa tolǵan áıelder de áskerı shaqyrylýǵa jatady.
Buǵan deıin Izabellanyń úlken aǵasy, taq murageri Krıstıan da Slagelsede qyzmet ótken. Ótken jazda ol qyzmetin aıaqtap, leıtenanttyq oqýǵa tústi.