Qazaqstanda medısınalyq kadrlar daıarlaý tásili ózgeredi: joǵary oqý oryndary men kolejderdegi oryndar sany óńirlerdiń mamandarǵa degen naqty qajettiligine qaraı qalyptasady, dep habarlaıdy infohub.kz.
QR Densaýlyq saqtaý mınıstrliginiń tıisti buıryq jobasy «Ashyq NQA» portalynda jarıalanyp, 3 tamyzǵa deıin talqylaýda.
Jańa tetik kadrlyq josparlaý júıesine kóshýdi kózdeıdi, bul rette memlekettik bilim berý tapsyrysy densaýlyq saqtaý qajettiliginiń boljamdary negizinde qalyptasatyn bolady. Densaýlyq saqtaý mınıstrliginde túsindirgendeı, búginde salanyń basty problemalarynyń biri – medısınalyq qyzmetkerlerdiń birkelki bólinbeýi: keıbir óńirlerde mamandardyń tapshylyǵy sezilse, endi birinde kadrlyq júkteme basqasha bólingen.
Jobaǵa sáıkes, qajettilikti esepteý kezinde halyqtyń sany men qurylymy, aýrýshańdyq deńgeıi, medısınalyq kadrlarmen qamtamasyz etilýi, aýrýhanalar men emhanalar jelisiniń damýy, sondaı-aq densaýlyq saqtaý júıesiniń qajettiliginiń ózgerý boljamdary eskeriletin bolady. Osy derekter negizinde jyl saıyn elge qansha dáriger men medısına mamany qajet ekeni, qaı óńirlerde kadr tapshylyǵy baıqalatyny, qandaı medısınalyq baǵyttar boıynsha qabyldaýdy ulǵaıtý nemese túzetý qajettigi jáne oqý oryndarynyń qansha ornyn qalyptastyrý kerektigi anyqtalady.
Densaýlyq saqtaý mınıstrligi jańa tásil dárigerler daıarlaýdy qysqartýdy bildirmeıtinin atap ótti. Onyń mindeti – oqytýdy nysanaly etý, ıaǵnı mamandar bilimi suranysqa ıe bolatyn baǵyttar boıynsha bilim alýy. Medısına qyzmetkerleri tapshy óńirlerge erekshe kóńil bólinedi. Dálirek josparlaý kadrlardy tıimdi bólýge jáne halyqqa medısınalyq kómektiń qoljetimdiligin arttyrýǵa múmkindik beredi dep kútilýde.