Ótken demalys kúnderi Pavlodar oblysyna burshaq aralas daýyl soǵyp, 11 eldi mekendi jaryqsyz qaldyrdy jáne ondaǵan úıdiń tóbesi men qasbetin zaqymdady. Bul týraly infohub.kz saıty habarlady.
Oblys ákimdiginiń málimetinshe, eń aýyr zalal Aqsý qalasyndaǵy Qalqaman kenti men Ekibastuz mańyndaǵy Qudaıkól aýylynda tirkelgen. Onda eki kóppáterli jáne 47 jeke úıdiń tóbesi ishinara julynyp ketken. Qalqamanda eki mektep pen mádenıet úıiniń qasbeti men terezeleri búlingen, al bir kóppáterli úıdiń birneshe páterinde bólme aralyq qabyrǵalar qulaǵan.
Tabıǵı apat saldarynan Aqsý men Ekibastuzdyń 11 eldi mekeni jaryqsyz qaldy. Sonymen qatar, Qalqaman men Qudaıkól arasyndaǵy EEK 220 kV elektr berý jelisiniń ýchaskesinde segiz tirek zaqymdanǵan. Qazirgi kezde energetıkter avarıalyq-qalpyna keltirý jumystaryn jalǵastyrýda. Segiz eldi mekende elektrmen jabdyqtaý tolyq qalpyna keltirilse, taǵy úsheýinde ishinara berilip tur.
Oblys ákimi Asaın Baıhanov zaqymdanǵan nysandardy aralap, jergilikti turǵyndarmen kezdesip, tıisti vedomstvolar, ákimdikter, azamattyq qorǵaý qyzmetteri men komýnaldyq kásiporyndar ókilderiniń qatysýymen jedel keńes ótkizdi. «Barlyq zaqymdanǵan nysandardy tekserýdi múmkindiginshe tez arada aıaqtap, elektrmen jabdyqtaýdy tolyq qalpyna keltirip, shatyrlar men basqa da zaqymdanǵan qurylymdardy jóndeýdi uıymdastyryp, zardap shekken úılerdiń turǵyndaryna qajetti kómek kórsetý qajet», — dep tapsyrdy ákim. Onyń aıtýynsha, mektepter men basqa da áleýmettik nysandardy qalpyna keltirýge erekshe nazar aýdarylyp, olardyń odan ári paıdalanýǵa ýaqytyly daıyndalýy qajet.
Arnaıy komısıalar keltirilgen zalaldy baǵalaýdy jalǵastyrýda. Ákimdiktiń dereginshe, daýyldan qaza tapqandar men zardap shekkender joq. Eske sala keteıik, tabıǵı apat aımaqqa 19 shildede soqqan bolatyn. Daýyldy jel naızaǵaı men burshaqpen birge boldy.
Buǵan deıin daýyldan keıin oblystyń alty turǵyny, onyń ishinde úsh jasóspirim medısınalyq kómekke júgingeni habarlanǵan bolatyn. Pavlodarda burshaq aralas daýyl jaǵalaýdaǵy úlken ekrannan álem chempıonatynyń fınalyn tamashalap otyrǵan fýtbol jankúıerlerin ań-tań qaldyrdy. Al Ekibastuzda bılik jergilikti deńgeıdegi tótenshe jaǵdaı rejımin jarıalaýdy kózdep otyr.