Qazaqstan Dúnıejúzilik densaýlyq saqtaý uıymynyń qoldaýymen Aral óńiri turǵyndarynyń densaýlyǵyn qorǵaýǵa arnalǵan jańa baǵdarlamany iske qosyp otyr. Óńirde medısınalyq jáne ekologıalyq monıtorıń kúsheıtiledi. Maqsat — sý men aýanyń sapasyna, klımatqa jáne ózge de faktorlarǵa baılanysty qaýipterdi erterek anyqtaý, dep habarlaıdy infohub.kz saıty.
Jol kartasyn densaýlyq saqtaý mınıstri Aqmaral Álnazarovanyń dıplomatıalyq mısıa basshylarymen kezdesýinde, DDU-nyń eldegi keńsesi basshysynyń qatysýymen tanystyrdy.
«Ekologıalyq faktorlar adamdardyń densaýlyǵyna áser etkenshe kútpeı, aldyn ala áreket etýimiz kerek. Biz qaýipterdi erterek kórip, aýrýlardyń aldyn alyp, adamdarǵa der kezinde kómek kórsetýimiz qajet», – dedi Álnazarova.
Qujatta sanıtarıalyq-epıdemıologıalyq jáne medısınalyq monıtorıńti kúsheıtý, sondaı-aq sý men aýanyń sapasynyń, klımattyq jáne basqa da faktorlardyń turǵyndar densaýlyǵyna áserin taldaý úshin ǵylymı zertteýlerdi damytý men sıfrlyq tehnologıalardy paıdalaný jazylǵan.
Erekshe nazar balalarǵa, júkti áıelderge, zeınetkerlerge jáne sozylmaly aýrýy bar naýqastarǵa aýdarylady.
«DDU Qazaqstanǵa qorshaǵan orta máselelerin qazirgi jáne bolashaq urpaqtyń densaýlyǵy múddesinde keshendi túrde sheshýge járdemdesedi», – dedi óz sózinde QR-daǵy DDU keńsesiniń basshysy Skender Syla.
Jańa jospar 2026–2030 jyldarǵa, ıaǵnı bes jylǵa arnalǵan. Ol osy jyldyń sáýirinde Astanada ótken óńirlik ekosammıtte qol jetkizilgen ýaǵdalastyqtardyń praktıkalyq jalǵasy bolǵany atap ótildi.
Eske salaıyq, sáýirde Qazaqstan prezıdenti Qasym-Jomart Toqaev Aqordada Araldy qutqarý halyqaralyq qoryn qurýshy memleket basshylary keńesiniń otyrysyn ótkizip, yntymaqtastyqty kúsheıtýge baǵyttalǵan birqatar bastama usynǵan bolatyn.