Densaýlyq saqtaý mınıstrliginiń jospardan tys tekserýleri qorytyndysy boıynsha Qazaqstanda 104 stomatologıalyq klınıka men 270 prosedýralyq kabınet jabyldy. Olardyń kóbi lısenzıasyz jumys istep, dári-dármek saqtaý erejelerin buzǵan, dep habarlaıdy infohub.kz saıty.
Vedomstvonyń málimetinshe, 104 stomatologıalyq klınıka óz erkimen lısenzıasyn qaıtarǵan, al 270 prosedýralyq kabınet te erikti túrde jumysyn toqtatqan. Mınıstrlik tek 17 zańsyz stomatologıany májbúrlep japqan.
Tekserý qorytyndysy boıynsha «uıatsyz» stomatologıalyq klınıkalarǵa jalpy somasy 100 mln teńge bolatyn 555-ke jýyq aıyppul salynǵan. Jeke prosedýralyq kabınetterden 16 mln teńge óndirilgen. «Osylaısha, barlyǵy 116 mln teńgeden astam somaǵa 702 ákimshilik jaza qoldanyldy», — dep naqtylady vedomstvo.
Erikti túrde jumysyn toqtatqan prosedýralyq kabınetterdiń eń kóp sany Jambyl oblysynda (96 nysan) jáne Astanada (87 mekeme) tirkelgen. Jeke stomatologıalyq klınıkalar kóbinese Aqtóbe (7 klınıka) jáne Qyzylorda (3 klınıka) oblystarynda jabylǵan.
Densaýlyq saqtaý mınıstrliginiń dereginshe, anyqtalǵan buzýshylyqtar qurylymynda basty máseleler — lısenzıasyz qyzmet jáne dári-dármek saqtaý erejelerin buzý bolyp otyr. Sondaı-aq bilikti kadrlardyń jáne shuǵyl kómek kórsetýge arnalǵan dári-quraldar jıyntyǵynyń joqtyǵy tirkelgen.
Buǵan deıin burynǵy densaýlyq saqtaý mınıstri Eljan Birtanov jeke klınıkalardy «jappaı jabý» tásilin synǵa alǵan edi. Onyń pikirinshe, mundaı sharalar kezektiń ulǵaıýyna jáne emdeý baǵasynyń ósýine ákelýi múmkin.