Qazaqstanda ınternderdi daıarlaý men jumysqa ornalastyrýdy joǵary oqý orny, klınıka jáne bolashaq dáriger arasyndaǵy úshjaqty kelisimshart júıesine kóshirý josparlanýda. Tıisti buıryq jobasyn Densaýlyq saqtaý mınıstrligi ashyq NQA portalynda jarıalady, dep habarlaıdy infohub.kz saıty.
Qujatqa sáıkes, jańa tetik memlekettik tapsyrystyń ashyqtyǵyn qamtamasyz etýge, jas mamandardy qoldaýǵa jáne óńirlerdegi medısınalyq kadrlar tapshylyǵyn joıýǵa baǵyttalǵan. Sonymen qatar, ol jas dárigerlerdiń pasıenttermen jumys isteýge beıimdelýine kómektesýi tıis.
«Bilim berý uıymy, jumys berýshi jáne ıntern-dáriger arasyndaǵy úshjaqty kelisimshart tetigi ár taraptyń jaýapkershiligin aldyn ala aıqyndaýǵa, sapaly oqytýdy qamtamasyz etýge, jas mamandy jumysqa ornalastyrý kezinde qoldaý kórsetýge jáne memlekettik tapsyrys boıynsha mindettemelerdi tıimdi oryndaýǵa múmkindik beredi», – delingen túsindirmede.
Buıryq jobasy sondaı-aq «ıntern-dáriger» uǵymyn resmı bekitýdi kózdeıdi. Densaýlyq saqtaý mınıstrliginiń pikirinshe, bul bolashaq mamannyń mártebesin, onyń quqyqtary men mindetterin naqty aıqyndaýǵa, sondaı-aq oqý jáne praktıkalyq daıarlyq prosesin barynsha ashyq etýge múmkindik beredi.
Buǵan deıin Densaýlyq saqtaý mınıstrligi medısınalyq joǵary oqý oryndaryndaǵy oryndar sany jergilikti aýrýhanalar men emhanalardyń naqty suranystaryna qaraı esepteletin jańa qaǵıdalardy daıyndaǵan bolatyn. Tar mamandardyń synı tapshylyǵy baıqalatyn óńirlerge erekshe mán beriledi. Jańashyldyqtyń basty maqsaty – mamandar daıarlaýdy josparlaýdyń biryńǵaı júıesin qurý ekendigi atap ótildi.
Oǵan deıin «Kýrsıv» Qazaqstanda dárigerlik qatelikterdi barynsha azaıtýǵa kómektesetin saraptamalyq medısınalyq ortalyqtar júıesin engizý josparlanyp jatqanyn jazǵan bolatyn.