Qazaqstannyń Densaýlyq saqtaý mınıstrligi óndiriste alynǵan jaraqattardyń aýyrlyq dárejesin anyqtaý erejelerine ózgerister engizetin buıryq jobasyn qoǵamdyq talqylaýǵa usyndy. Qujatta dárigerler qorytyndy shyǵarǵan kezde eskerýge tıis faktorlar tizbesi belgilengen — zaqymdaný sıpatynan ómirge tónetin qaýip pen múgedektik qaýpine deıin, dep habarlaıdy infohub.kz saıty.
Jobaǵa sáıkes, óndiristik jaraqattyń aýyrlyǵyn baǵalaý kezinde mamandar zardap shekken adamnyń jaǵdaıy týraly klınıkalyq derekterdi, sondaı-aq dıagnostıka men emdeýdiń medısınalyq standarttaryn basshylyqqa alýǵa mindetti.
Aýyrlyq dárejesin anyqtaýdyń negizgi ólshemsharttary: alynǵan zaqymdanýlardyń sıpaty men dárejesi (synyqtar, kúıikter, ishki aǵzalardyń zaqymdanýy, bas súıek-mı jaraqattary jáne t.b.); ómirge tikeleı qaýiptiń bolýy; eńbekke ýaqytsha qabiletsizdik kezeńiniń uzaqtyǵy; jalpy nemese kásibı eńbekke qabilettiliktiń turaqty joǵalýy; aýrýhanaǵa jatqyzý, hırýrgıalyq aralasý nemese reanımasıalyq sharalar qajettiligi; jaraqattyń saldary (saýyǵý, múgedektik nemese ólim).
Vedomstvonyń aıtýynsha, erejelerdi jańartý medısınalyq kómek sapasyn arttyrýǵa, densaýlyq saqtaý júıesiniń resýrstaryn tıimdi paıdalanýǵa jáne Qazaqstannyń halyqaralyq standarttarǵa sáıkes damýyn jalǵastyrýǵa múmkindik beredi.
Qujatty talqylaý aǵymdaǵy jyldyń 19 tamyzyna deıin jalǵasady.
Buǵan deıin «Kýrsıv» 2025 jyly Qazaqstandaǵy jumys oryndarynda 2 328 adam zardap shekkenin, onyń 184-i ólimmen aıaqtalǵanyn habarlaǵan. 2024 jyly 2 471 adam jaraqat alǵan.