Qazaqstanda qazan aıynan bastap pasıentterdiń dárigerge qanshalyqty ońaı qabyldaýǵa bara alatyny jappaı tekseriledi. Bul sharaǵa Densaýlyq saqtaý mınıstri Aqmaral Álnazarovanyń adamdar bos keste bolsa da ýchaskelik jáne beıindik dárigerlerge jazyla almaı jatqanyna narazylyǵy sebep boldy, dep habarlaıdy infohub.kz saıty.
«Adam polıklınıkaǵa baryp, dárigerge jazyla almasa, qandaı medısınalyq kómektiń qoljetimdiligi týraly aıtýǵa bolady? Bul — jergilikti jerde qamtamasyz etilýi tıis qarapaıym dúnıeler», — dedi Densaýlyq saqtaý mınıstrliginiń basshysy.
Medısınalyq baqylaý komıtetiniń jetekshisi Laýra Ahmetnıazdyń aıtýynsha, tekserý pasıentterge óz betinshe qabyldaýǵa jazylý áli de qıyn ekenin kórsetti. Polıklınıkalardaǵy dárigerlerdiń jumys kestesi jasalǵanymen, terapevter men tar mamandarǵa bos jazylý is júzinde jıi jabyq nemese qoljetimsiz bolyp shyǵady.
«Másele tek kesteniń bolýynda emes, pasıenttiń óz betinshe qabyldaýǵa jazylý múmkindiginde. Anyqtalǵan kemshilikter boıynsha medısınalyq uıymdarǵa usynymdar jiberiledi», — dedi Ahmetnıaz.
Aıta keteıik, kelesi aıdan bastap polıklınıkalardaǵy dárigerge jazylý jaǵdaıy aptasyna eki ret baqylanady.
Óz kezeginde Álnazarova óńirlerdiń densaýlyq saqtaý basqarmalaryna bul máseleni turaqty baqylaýǵa alýdy tapsyrdy. Ol densaýlyq saqtaý júıesi qazaqstandyqtarǵa onlaın da, oflaın da qoljetimdi bolýy kerektigin atap ótti.
«Dárigerge jazylý múmkindigi — bul jergilikti jerdegi búkil densaýlyq saqtaý júıesiniń kúndelikti jumysy», — dedi mınıstr.
Tamyz aıynyń sońynda «Kýrsıv» birneshe jyl qatarynan tómen nátıje kórsetip kele jatqan polıklınıkalardy qarjylandyrý tásilderi qaıta qaralatynyn jazǵan bolatyn.