Qazaqstanda dári-dármektiń memlekettik baǵasyn retteý erejeleri qaıta qaralyp, dárihana sórelerindegi baǵa arzandady: shekti baǵa 3 801 dári ataýyna, ıaǵnı jalpy tizimniń 76%-yna tómendetildi. 2025 jyly orta eseppen 26,5%-ǵa arzandasa, 2026 jyly da dári baǵasynyń tómendeýi tirkeldi, dep habarlaıdy infohub.kz saıty.
Densaýlyq saqtaý mınıstrliginiń málimetinshe, 947 dárilik preparattyń baǵasy ózgerissiz qaldy, al tizim 246 jańa ataýmen tolyqty.
Aǵymdaǵy jylǵa kelsek, 2026 jyldyń basynan beri kóterme jáne bólshek saýdaǵa arnalǵan 2055 dáriniń jańa baǵasy bekitildi. Osy kezeńde baǵa 16%-ǵa tómendedi.
Arzandaý tegin medısınalyq kómektiń kepildendirilgen kólemi (TMKKK) jáne mindetti áleýmettik medısınalyq saqtandyrý (MÁMS) aıasynda beriletin preparattarǵa da qatysty. Munda 1 397 saýda ataýy boıynsha, ıaǵnı 47,8%-ǵa baǵanyń tómendeýi tirkeldi.
Sondaı-aq TMKKK jáne MÁMS aıasynda dárilik zattardyń halyqaralyq patenttelmegen ataýlaryna shekti baǵalar qaıta qaraldy. 453 pozısıa boıynsha baǵa tómendedi.
Farmasıa komıtetiniń tóraǵasy Baýyrjan Júsipovtiń aıtýynsha, bul nátıjeler shekti baǵany qalyptastyrý tásilderin qaıta qaraýmen baılanysty.
«Búginde óndirýshi málimdegen qun qujatpen rastalyp, referentti elderdegi baǵalarmen salystyrylady. Bul rette úsh eń tómen baǵanyń ortasha máni paıdalanylyp, derekter halyqaralyq kózderdegi aqparatpen qosymsha rastalady. Mundaı tásil dáriniń málimdelgen qunyn neǵurlym obektıvti baǵalaýǵa jáne shekti baǵany qalyptastyrýǵa múmkindik beredi», – dedi Júsipov.
Qazirgi tańda Qazaqstannyń referenttik sebetine Ázirbaıjan, Belarýs, Bolgarıa, Vengrıa, Qyrǵyzstan, Polsha, Reseı Federasıasy, Slovenıa, Túrkıa jáne Ózbekstan kiredi.
Buǵan deıin «Kýrsıv» qazaqstandyq dárihanalarda 589 farmpreparattyń baǵasy tómendegenin jazǵan bolatyn. Eń kóp arzandaǵany – antıbıotıkter, sondaı-aq júrek-qan tamyrlary jáne asqazan-ishek aýrýlaryna qarsy dáriler.