Túrkistan oblysy aýdandyq máslıhatynyń depýtaty Erǵalı Amanbaev buryn «777» nómirimen Lexus kóligin júrgizip, jol erejesin buzǵan skandalmen tanymal bolsa, endi ony Qytaı azamatshasyn zorlady dep kúdikteıdi, dep habarlaıdy NUR.KZ saıty.
Halyqstan Telegram-arnasynyń málimetinshe, Báıdibek aýdandyq polısıa bólimine Almaty turǵynynan aryz túsken. Onyń aıtýynsha, ol Baıjansaı aýylyna Qytaıdan kelgen tórt tanysymen — osy óńirdegi qorǵasyn-myrysh kenin óndirýge qyzyǵýshylyq tanytqan áleýetti ınvestorlarmen — birge kelgen. Qonaqtardy depýtat Erǵalı Amanbaev qarsy alyp, ertip júrip, keıin olarǵa demalys uıymdastyrǵan.
Depýtattyń qonaqjaılylyǵy shekten shyqqan. Áıeldiń nusqasy boıynsha, Amanbaev 34 jastaǵy Qytaı azamatshasyn óziniń buryn Shymkentte qaýipti manevrler jasaǵan Lexus kóligine otyrǵyzyp, elsiz jerge aparyp, onymen eriksiz jynystyq qatynasqa túsken.
Túrkistan oblysy polısıa departamentiniń NUR.KZ tilshisine habarlaýynsha, osy fakti boıynsha sotqa deıingi tergeý júrgizilýde. Kúdikti — Shymkent turǵyny — anyqtalyp, qamaýǵa alyndy. Qazirgi ýaqytta barlyq mán-jaılardy anyqtaý úshin qajetti sharalar júzege asyrylýda. Tergeý qorytyndysy boıynsha qoldanystaǵy zańnama aıasynda tıisti sheshim qabyldanady. Vedomstvonyń baspasóz qyzmeti QR QPK-niń 201-babyna sáıkes tergeý múddesine baılanysty ózge aqparatty jarıa etpeıtinin málimdedi.
Eske salaıyq, byltyr tamyz aıynda Shymkentte «ádemi nómirli» (úsh jeti) Lexus júrgizýshisiniń jol erejesin buzǵan vıdeosy jelide taraǵan edi. Paıdalanýshylar kadrdan Túrkistan oblysy Báıdibek aýdany máslıhatynyń depýtaty Erǵalı Amanbaevty tanydy. Shymkent polısıa departamenti júrgizýshiniń QR ÁQBtK-niń birneshe baby boıynsha: jalǵan tirkeý nómirimen kólik júrgizý, qarsy baǵytta júrý, mindetti saqtandyrýdyń bolmaýy, qaýipsizdik beldigin taqpaý, tyıym salynǵan jerlerde keri júrý, sondaı-aq baǵyt belgisin bermeýdi qamtıtyn jol qozǵalysy erejesiniń talaptaryn oryndamaý faktileri boıynsha jaýapkershilikke tartylǵanyn habarlady. Nátıjesinde depýtat 4 táýlikke qamalyp, bir jylǵa kólik júrgizý quqyǵynan aıyryldy. Alaıda onyń áriptesteri onyń minez-qulqy depýtattyq etıka normalaryna qaıshy kelmeıdi dep sheshti.