Ýels hanshaıymy Dıananyń tarıhta «kek qaıtarý kóılegi» degen atpen qalǵan qara kóılegi 30 jyldan keıin alǵash ret saýdaǵa shyǵarylmaq. Lottyń baǵasy 150 myńnan 300 myń dollarǵa deıin dep baǵalanyp otyr, dep habarlaıdy infohub.kz saıty.
Sotheby's aýksıon úıiniń keshki saýdasy 9 jeltoqsanǵa belgilengen. Saýda bastalǵanǵa deıin ańyzǵa aınalǵan kóılek Londonda, Gonkongte jáne Jenevada kópshilikke kórsetiledi.
Dıana bul kóılekti 1994 jyldyń maýsymynda Londondaǵy Serpentine galereıasynda ótken Vanity Fair keshinde kıgen edi. Sol kúni onyń burynǵy kúıeýi, sol kezdegi hanzada Charlzdiń nekede turǵanda opasyzdyq jasaǵanyn moıyndaǵan suhbaty jaryq kórdi.
Alǵashynda Dıana shyǵý úshin basqa kıim tańdaýdy josparlaǵan, alaıda sońǵy sátte oıyn ózgertti. Stambolánnyń ıyǵy ashyq kóılegi onyń garderobynda shamamen úsh jyl jatty, biraq buǵan deıin hanshaıym ony kópshilik aldyna kıýge tym batyl dep sanaǵan. Dıananyń beınesin marjan kole, qyzyl tyrnaqtar men oǵan úılesetin pomada tolyqtyrdy. Hanshaıymnyń burynǵy stılısi Anna Harvı keıinirek Dıananyń «mıllıon dollarǵa laıyq kóringisi kelgenin» eske aldy. Osy shyǵýdan keıin kóılek «kek qaıtarý kóılegi» degen ataýǵa ıe bolyp, aıyrylysqannan keıingi senimdi pýblıkalyq beıneniń sımvolyna aınaldy. Dıana ony budan bylaı kópshilik aldynda kımedi.
1997 jyly hanshaıym kóılekti qaıyrymdylyq aýksıonyna qoıǵan 79 kıimniń tizimine engizdi. Jınalǵan qarajat qaterli isik jáne AITV/JITS aýrýlarymen aýyratyn adamdarǵa kómektesetin uıymdarǵa jiberildi.
Qazirgi ıeleri kóılekti sol saýdada satyp alyp, sodan beri ózderinde saqtap keledi. Aldaǵy satylymnan túsken qarajattyń bir bóligi de qaıyrymdylyqqa baǵyttalady — olar Edınbýrg kоróldik aýrýhanasynyń atynan NHS Lothian Charity qoryna beriledi.
Ótken onjyldyqtarda kóılek Dıananyń eń tanymal beıneleriniń birine aınaldy. Dızaıner keıinirek onyń kóshirmesin jasady, al uqsas kıim Netflix serıaly «Koronada» hanshaıym beınesin qaıta jańǵyrtý úshin paıdalanyldy. Aýksıonǵa sol keshke qatysty basqa da zattar qoıylǵan bolatyn.
Osy jyldyń maýsymynda Dıana Serpentine galereıasynyń janynda túsken jasyl Jaguar XJ40 Sovereign kóligi 66 250 fýnt sterlıńke (40 mln teńgeden astam) satyldy. Aıta keteıik, túpnusqa kóılek saýda aldynda birneshe qalada kópshilikke qoıylady, sodan keıin 9 jeltoqsanda Nú-Iorkte balǵamen satylady.
Eske salaıyq, hanshaıym Dıana — hanzada Charlzdiń, qazirgi kоról Karl III-niń burynǵy jubaıy, hanzadalar Ýılám men Garrıdiń anasy. Bolashaq hanshaıym Eltorp vıkonty Djon Spenser men Frensıs Rýt Roshtyń otbasynda dúnıege kelgen. 1 shildede hanshaıym Dıana 65 jasqa tolar edi. Ol 1997 jyly 31 tamyzda 36 jasynda qaza tapty.