Reseılik ánshi Dıma Bılan Qaraǵandydaǵy jaqynda ótken konsertinen keıingi áserimen áleýmettik jelide bólisti. Ol bul sahnaǵa 20 jyldan keıin shyqty, dep habarlaıdy infohub.kz saıty.
44 jastaǵy ártis sońǵy ret bul qalada 2006 jyly óner kórsetkenin eske saldy. «Mine, bir ómir ótken soń osynda qaıta oraldym — aldymda 250 000 adam. Shırek mıllıon. Sahnaǵa shyǵyp, kóz aldyńda adamdardyń sheksiz kókjıegin kórgende birneshe sekýnd tiliń baılanyp qalady», — dedi ol.
Bılannyń aıtýynsha, jıyrma jylda barlyǵy derlik ózgergen. «Biz óstik. Qalalar, mýzyka, ózim de ózgerdim. Qanshama jol, el, konsert, oqıǵa, jeńis, kúmán boldy... Biraq ýaqyt sheginetin nárseler bar. Men Qaraǵandy sahnasynda turyp, jıyrma jyl buryn osynda bolǵanymdy oıladym. Sol kezdegi Dıma bul qalamen kelesi kezdesýimiz qandaı bolaryn elestete alar ma edi? 20 jyldan keıin 250 000 adam. Menińshe, ómir odan ádemi senarı oılap taba almas edi. Qaraǵandyǵa rahmet. Qazaqstanǵa osy kezdesý úshin jáne ózimmen birge alyp ketken, bir-birimizben almasqan sezimniń aýqymy úshin rahmet», — dep bólisti ánshi.
Ártistiń Qazaqstanda taǵy eki konserti bar: 20 qarashada Astanada, 22 qarashada Almatyda óner kórsetedi. «Eki úlken jeke konsertim. Múlde basqa keńistik, basqa dramatýrgıa, basqa shoý, biraq mýzyka arqyly sol bir áńgime. Kezdeskenshe!» — dep qorytyndylady Bılan.