Qazaqstan men Qyrǵyzstannyń Halyq ártisi Dımash Qudaıbergenniń «Akerke» jańa áni 30 shildede Japonıanyń Kiryu FM radıosynda tuńǵysh ret oryndalady. Bul týraly infohub.kz saıty habarlady.
Ánshiniń shyǵarmashylyǵyna arnalǵan Music Forever baǵdarlamasynyń arnaıy shyǵarylymy japondyq Dimash Japan Fan Club fan-klýbynyń qatysýymen daıyndaldy. Efırde «Akerke»-den bólek, Love’s Not Over Yet, Kieli Meken, Love of Tired Swans, Daididau, Omir jáne Olimpico kompozısıalary shyrqalady.
Kiryu FM radıosy 2020 jyldan beri japondyq tyńdarmandardy Dımashtyń mýzykasymen tanystyryp, onyń barlyq jańa týyndylaryn turaqty túrde efırge qosyp keledi. Music Forever baǵdarlamasy Gýmma prefektýrasyndaǵy Kırú qalasynan taratylady, ony Kazýdzı Kato men Kóko Iamamoto júrgizedi. Efırler aıyna eki ret — ár aıdyń birinshi jáne úshinshi beısenbisinde japon ýaqytymen 19:06-dan 19:59-ǵa deıin (Astana ýaqytymen 15:06-dan 15:59-ǵa deıin) ótedi, kelesi kúni qaıtalanady.
Buǵan deıin Dımashtyń ápkesi Raýshan jańa ánge arnalǵan chellendjge qosyldy: «Akerke» ánine bılep, áleýmettik jelige jarıalaý kerek. Eń kóp qaralym jınaǵan beınerolıktiń avtory ánshiniń kelesi klıpine túsedi.